Kur ka qenë hera e fundit që e keni ndërruar furçën e dhëmbëve? Kanë kaluar më shumë se 4 muaj? Nëse përgjigja është pozitive, nuk jeni vetëm. Sipas disa studimeve, 42% e njerëzve nuk e ndërrojnë furçën e dhëmbëve aq shpesh sa duhet. Kjo gjë mund të sjellë probleme me shëndetin oral, siç janë shtimi i baktereve, dëmtimi i smaltit, prishja e dhëmbëve etj.
Për të shmangur të gjitha këto, duhet të keni parasysh që furça duhet ndryshuar çdo 3-4 muaj. Kjo është e domosdoshme për një shëndet sa më të mirë oral, duke qenë se furça konsumohet dhe nuk është më efektive në pastrimin e dhëmbëve. Madje, furça e vjetër mund të ndikojë edhe në enjtjen e mishrave të dhëmbëve.
Po ashtu, rekomandohet që në rastet kur jeni të sëmurë me grip apo me ndonjë infeksion bakterial, është mirë ta ndërroni furçën për të shmangur rikthimin e infeksionit.
