Nëse jeni duke kërkuar mënyra për të N shini produkte, të cilat forcojnë sistemin imunitar.
“Për të shmangur problemet e shëndetit gjatë stinës së ftohtë, të shkaktuara nga temperaturat e ulëta të motit, përveç veshjeve të trasha dhe ruajtjes nga këto temperatura, një faktor i rëndësishëm është edhe ushqimi. Një ushqim dhe stil jetese i rregullt, me vakte të rregullta dhe larmishmëri frutash dhe zarzavatesh, është mënyra më e mirë për të pasur një sistem imunitar të fortë”, pohon dietologia Enkeleida Ferrollari.
Vitamina C mendohet se rrit prodhimin e qelizave të bardha të gjakut, të cilat janë thelbësore për të luftuar infeksionet. Agrumet, si portokajtë dhe mandarinat, janë të pasura me vitaminë C.
“Në çdo vakt duhet të kemi fruta dhe zarzavate pjesë të menysë tonë. Gjithashtu, edhe proteinat janë elemente shumë të rëndësishme për forcimin e sistemit imunitar. Burim i proteinave janë mishi, peshku, pula, bishtajoret në formën e fasuleve, thjerrëzave etj. Duhet të përzgjedhim pulën dhe peshkun, në vend të mishit të kuq. Frutat e thata janë një burim proteinash dhe acideve yndyrore të pangopura në formën e omega 3, vitaminë E, të cilat veprojnë si antioksidantë“, shton më tej dietologia.
Një sistem imunitar i fortë ndihmon edhe në parandalimin e sëmundjeve të ndryshme.
KUJDESI PËR FËMIJËT
Në këtë periudhë, një kujdes i veçantë duhet treguar edhe me fëmijët. Sipas Ferrollarit, ka zakone të shëndetshme që mund të adoptoni për të forcuar sistemin imunitar të fëmijës suaj. Një ndër to është shmangia nga menyja e tyre e ushqimeve të pasura me sheqer, me kripë apo të përpunuara.
Rekomandohet që të konsumohen sa më shumë fruta dhe perime si: karotat, fasulet, portokajtë, luleshtrydhet. Të gjitha këto përmbajnë fitonutrientë të tillë që rritin imunitetin, si vitamina C dhe karotenoidet.
Po ashtu, rëndësi kanë edhe orët e gjumit që bëjnë. Privimi i gjumit mund t’ju bëjë më të ndjeshëm ndaj sëmundjeve. Por për sa orë gjumë kanë nevojë fëmijët? Një i porsalindur mund të ketë nevojë deri në 18 orë në ditë, fëmijët e vegjël kërkojnë nga 12 deri në 13 orë dhe parashkollorët kanë nevojë për rreth 10 orë.
Për foshnjat e porsalindura, ushqyerja me qumësht gjiri është e rëndësishme. Qumështi i gjirit përmban antitrupa që rritin imunitetin dhe qelizat e bardha të gjakut, duke i mbrojtur nga infeksionet e veshit, alergjitë, diarreja, pneumonia, meningjiti, infeksionet e traktit urinar. Studimet tregojnë se mund të përmirësojë fuqinë e trurit të foshnjës suaj dhe të ndihmojë në mbrojtjen e saj nga diabeti.
