Sërish shqiptarët e kanë të pamundur të udhëtojnë drejt vendeve të Bashkimit Evropian, të paktën deri më datë 31 korrik.
Pas vendimit të marrë nga vendet e bllokut të BE-së për shkak të situatës me koronavirusin, reagoi edhe Ministria për Evropën dhe Punët e Jashtme.
Sipas saj Këshilli Evropian ka publikuar listën e përditësuar me vendet e treta për të cilat BE-ja do të heqë masat kufizuese për udhëtimet jo-esenciale.
“Theksojmë se asnjë nga vendet e Ballkanit Perëndimor, përfshirë Shqipërinë, nuk janë pjesë e grupit të shteteve për të cilat do të hiqen masat kufizuese për udhëtimet jo-esenciale në BE.
Kriteret për të përcaktuar vendet e treta për të cilat duhet të hiqet kufizimi aktual i udhëtimit, mbulojnë veçanërisht situatën epidemiologjike dhe masat e kontrollit, përfshirë distancën fizike, si dhe çështjet ekonomike dhe sociale”, thuhet në njoftim.
Vendimi bazuar në rishikimin e Rekomandimit të Këshillit të datës 30 qershor parashikon gjithashtu rastet kur personat nga vendet treta për të cilat vazhdojnë të mbeten në fuqi masat e përkohshme kufizuese, mund të udhëtojnë në vendet e BE-së si më poshtë:
1. Qytetarët e BE-së dhe anëtarët e familjes së tyre
2. Shtetas të vendeve të treta që janë rezidentë afatgjatë në BE dhe anëtarët e tyre të familjes.
3. Udhëtarët me një funksion thelbësor, siç renditen në rekomandimin e datës 30 qershor.
Lista e vendeve të treta duhet të vazhdojë të rishikohet çdo dy javë dhe mund të përditësohet më tej nga Këshilli, sipas rastit, pas konsultimeve të ngushta me Komisionin dhe agjencitë dhe shërbimet përkatëse të BE-së pas një vlerësimi të përgjithshëm bazuar në kriteret e mësipërme.
