Të ftuar sot në emisionin “Rudina”, Manjola Hasani dhe Esdalin Gorani patën shumë për të rrëfyer. Si rrallëherë në një studio televizive, balerinët na treguan gjithçka që nuk dinim për jetën e tyre jashtë sallës së baletit. Shumë pak e dinë, por Ola dhe Esdalini njihen me njëri-tjetrën që prej moshës 10-vjeçare, kur të dy ndiqnin të njëjtën shkollë. Historia e tyre e dashurisë ka nisur si një lojë, në shfaqjen në teatër ‘’Hirushja’’, ku ata luanin rolin e mbretit dhe mbretëreshës. Pastaj u shndërrua në përrallën që të gjithë e dimë. Sot ata janë prindër të dy fëmijëve, vajzës 9-vjeçare, të quajtur Olesia dhe Oenit, 2 vjeç.
Edhe pse kanë ndërtuar një karrierë të suksesshme në fushën e baletit, Ola dhe Esdalini ua kanë ndaluar kategorikisht fëmijëve të merren me balet.
“Nuk diskutohet fare në shtëpinë tonë. S’na pëlqen fare”, -u shpreh Ola, ndërsa Esdalini shtoi:
“Ne kemi pasur një sallë baleti, para shumë vitesh, kur vajza ka qenë e vogël. Nuk kemi dashur t’ia imponojmë, duke ditur lodhjen që ka zanati ynë dhe feedback-un që merr mbrapsht. Nuk e kemi pasur qejf. Unë jo njëherë, kategorikisht. Në momentin që vajza vinte, kur bënim kurse, nuk e pranonim. Nuk donim ta ushqenim. Është profesion shumë i lodhshëm. Jemi super të kënaqur që nuk merret me këtë gjë. Le të bëhet avokate, doktoreshë, çfarë të dojë.”
