Luana Vjollca ka shtuar një tjetër sukses në listë. “Golden Panther Music Awards 2020” i ka dhuruar Luanës çmimin “Best Albanian Act Artist”. Ceremonia u mbajt ‘live’ në New York. Luana ka dërguar një falenderim për festivalin përmes një videoje.
Si gjithmonë, ‘vajza e shumë talenteve’ nuk ka harruar të përshëndesë fansat në veçanti. Ajo ka dërguar një puthje për ndjekësit e saj më besnikë. Njëkohësisht, Luana ka përcjellë një mesazh për njerëzit në mbarë botën.
“Përshëndetje ‘Golden Panther Awards’, përshëndes të gjithë njerëzit kudo në botë. I uroj shëndet dhe lumturi. Së bashku mund ta kalojmë këtë situatë. Dua t’ju falenderoj për nominimin dhe çmimin, jam shumë e lumtur që përfaqësoj një vend të vogël por kaq të dashur e të bukur si Shqipëria”, u shpreh Luana.
Çfarë është “Golden Panther Awards”?
“Golden Panther Awards” vlerëson këngëtarë nga e gjithë bota. Ceremonia e përvitshme ka sjellë në vëmendje artistë nga vende të ndryshme, ku përfshihet edhe Shqipëria. Këtë vit, Luana u nominua si “Artistja më e Famshme Shqiptare”, kategori për të cilën u vlerësua edhe me çmim.
