Përballja e 16 qershorit kundër Bayern Munichun mund të mbetet si ndeshja e fundit e Milot Rashicës me fanellën e Werder Bremenit, pasi që lojtari nga Kosova mund të mungojë në ndeshjen e xhiros së fundit të Bundesligës shkaku i një lëndimi dhe gjatë verës mund të transferohet në ndonjë klub tjetër.
Milot Rashica, u detyrua t’i lërë stërvitjet e së mërkurës në gjysmë pasi që e pësoi një lëndim. Kjo do të thotë që Bremeni mund të detyrohet të luajë në ndeshjen më të rëndësishme në historinë moderne të klubit pa yllin e skuadrës.
Faqja zyrtare e klubit gjerman e konfirmoi se Milot Rashica i la stërvitjet para kohe për shkak të një lëndimi që e pësoi në kyçin e këmbës gjatë një dueli.
“Milot Rashica i la stërvitjet më herët, të mërkurën. Sulmuesi e pësoi një lëndim në kyçin e këmbës gjatë një dueli. Për një diagnozë më precize, klubi është në pritje të edhe disa testeve të tjera”, shkruhej në mesazhin e shkurtër në faqen e Bremenit.
Nëse Rashica nuk do të jetë në gjendje të luajë në ndeshjen e fundjavës, atëherë ndeshja e 16 qershorit kundër Bayern Munichut mund të mbetet e fundit për të me fanellën e Bremenit, pasi që kosovari ka qenë vazhdimisht i spekuluar për një transferim këtë verë.
23-vjeçari, i cili nuk e ka mbajtur sekret dëshirën për t’u transferuar te ndonjë klub të Ligës së Kampionëve, më së shumti e ka tërhequr vëmendjen e RB Leipzigutm ndërsa së fundi u raportua për interesim edhe nga ana e Milanit.
Megjithatë, klauzola prej 38 milionë eurosh për shkëputjen e kontratës së Rashicës – që do të kishte rënë në 15 milionë me rënien potenciale të Bremenit nga Bundesliga – tashmë ka skaduar dhe klubet tani do të duhet të arrijnë marrëveshje me Bremenin nëse duan ta blejnë Rashicën
