Mërgim Mavraj kthehet përsëri në qendër të vëmendjes dhe përsëri për ngjarje që kanë të bëjnë pak me fushën e futbollit. Këtë herë, ish-kapiteni i Kombëtares së Shqipërisë akuzohet për qëndrim anti-Semit pasi ka fshirë nga harta Izraelin në një postim. “Nürnberger Zeitung” shpjegoi se pak ditë më parë Mavraj kishte postuar një foto në “Instagram”, në të cilin silueta e territoreve të Izraelit dhe Palestinës ishin mbuluar me lule. Në mes të fotos, me hashtag #FreePalestine (lironi Palestinën), shiheshin edhe konturet e Jerusalemit, por poshtë shkruhej vetëm Palestinë. Ndërsa Izraeli nuk paraqitej si shtet në hartë. Një reagim i cili sipas Daniela Einshtajn, drejtoresha e Muzeut Hebraik në Franken, tregonte se Mavraj mbante qëndrim anti-Semit më këtë postim. “Kjo sjellje është e papranueshme, mesazhi i Mavrajt kundërshton të drejtën e Izraelit për të ekzistuar”, theksoi ajo.
Klubi i Greuther Furthit, pjesë e të cilit është Mavraj, u distancua nga publikimi i mbrojtësit. “Si një klub, ne jemi pro tolerancës, diversitetit dhe barazisë dhe jemi kundër diskriminimit, racizmit dhe përjashtimit, të cilën ne e shprehim rreth fushatave tona vazhdimisht. Ndaj distancohemi nga publikime të tilla”, shkruante klubi në reagimin e tij.
Por ky lajm ka acaruar dukshëm Mavrajn, i cili nuk pranon akuzat dhe mendon se po e teprojnë me një përshkrim të tillë. “Përfundimi se unë jam anti-Semit është primitiv në kohët tona. Izraeli dhe Palestina kanë të njëjtën të drejtë të jenë në hartën e botës. Unë nuk i mohova Izraelit të drejtën për të ekzistuar”, shpjegoi ai për mediat gjermane. Ndërkohë, gjatë pasdites Mavraj ka postuar disa video në “Instagram” ku shpjegonte se nuk kishte qëndrime anti-Semite, por thjesht kërkonte që edhe Palestina t’i kishte të njëjtat të drejta. “Demokracia është për të dyja palët”, shkruante Mavraj.
