Është arrestuar personi i katër për vrasjen e Hekuran Billës para pak ditësh në zonën e “Komunës së Parisit”. Gjekson Pusi dyshohet se ka qenë transportuesi i Viktor Markut.
Ai është arrestuar në Shkodër.
Deri më tani janë arrestuar, Sebastiano Mali, nipi i të arrestuarit tjetër Viktor Marku i cili është vëllai i Prel Markut i vrarë nga Hekuran Billa në vitin 2006 në Britani.
Gjithashtu është arrestuar edhe Adjola Lakra, e cila dyshohet se është personi që nxorri në pritë Billën dhe më parë ka qenë e dashura e Malit.
Njoftimi:
Policia e Shtetit
Shkon në katër numri i personave të arrestuar për vrasjen e shtetasit H. B.
Si rezultat i veprimeve intensive hetimore që po kryhen nga Drejtoria Vendore e Policisë Tiranë, nën drejtimin e Prokurorisë së Rrethit Gjyqësor Tiranë, për zbardhjen dhe dokumentimin e plotë të ngjarjes së ndodhur mbrëmjen e 11 qershorit, ku mbeti i vrarë shtetasi H. B, një tjetër person ka rënë në prangat e Policisë.
Falë bashkëpunimit dhe koordinimit të veprimeve mes Drejtorisë Vendore të Policisë Shkodër dhe DVP Tiranë është vënë në pranga drejtuesi i mjetit që transportonte shtetasin V. M., i dyshuar si autori kryesor i vrasjes së shtetasit H. B.
Vihet në pranga shtetasi GJ. P., 33 vjeç, i cili u kap dhe u arrestua nga strukturat e Drejtorisë Vendore të Policisë Shkodër, pasi dyshohet se është autor i ngjarjes së ndodhur në fshatin Vukatanë, ku u qëllua me armë zjarri në drejtim të automjetit në pronësi të DPSHTRR, që drejtohej nga shtetasi F. H., 30 vjeç, banues në Dobraç, Shkodër.
Shtetasi Gj. P. ishte me masë sigurie “Arrest në shtëpi“, për veprën penale “Armëmbajtja pa leje”.
Gjithashtu, gjatë paradites së sotme, falë veprimeve hetimore të kryera nga strukturat e DVP Tiranë ka rezultuar se ky shtetas është i dyshuar si bashkëpunëtor në vrasjen e shtetasit H. B.
Burimi: top-channel.tv
