Ish portieri i gjeneratës së artë të klubit të futbollit Prishtina, Shukri Paçarada, tha se e admiron gazetën kombëtare “Bota sot”.
Paçarada, edhe sot kujtohet nga gjeneratat e vjetra, për debutimin fantastik në fanellën e Prishtinës pikërisht me 22 shkurt të vitit 1987 dhe fal shkëlqimit të tij, Prishtina e kishte importuar një pikë nga stadiumi “Marakana”, duke luajtur baras (0:0) me Cërvena Zvezdën e Beogradit, në ndeshjen e javës së 18-të të Ligës së Parë federative të ish Jugosllavisë.
“Ju uroj për trimërinë që tregoni që 25 vite. Ju e patët mundin dhe aftësinë, që kaq vite gjatë ta mbani Konstancën e informimit të drejt dhe me vlerë.
Po hyj edhe unë në rendin e gjatë të urimeve që do ti merrni.
E admiroj gazetën e juaj këtë përzierje prej tradicionales dhe modernes, me një fjalë udhëheqje me Stil. Kjo ishte dhe është mendimi im çelësi i suksesit të ‘Bota sot’.
Uroj që mos të ndryshoni dhe suksese”, uron Paçarada, që është edhe trajner në Gjermani.
