Përditësuar
Menaxheri i njohur i yjeve të mëdhenj të futbollit, Mino Raiola, thuhet se është ndarë nga jeta këtë të enjte, 28 prill, në moshën 54-vjeçare. Ky raportim është bërë sot në mediat italiane dhe më gjerë.
Por në një përditësim pas dreke, mediat italiane cituan Alberto Zangrillo, kreu i Njësisë së Anestezisë dhe Kujdesit Intensiv të spitalit “San Raffaele” në Milano, të ketë deklaruar se Raiola është në gjendje kritike për jetën.
Përfaqësuesi i lojtarëve si Ibrahimovic, Pogba, Donnarumma, Haaland etj., i ishte nënshtruar një operacioni janarin e kaluar në spitalin “San Rafaelo” të Milanos.
“Gazzetta dello Sport” raportoi në atë kohë se agjenti do të duhej të ishte nën vëzhgim të vazhdueshëm të mjekëve.
I lindur në Itali në vitin 1967, Mino Raiola cilësohet si një nga agjentët më të rëndësishëm në skenën aktuale të futbollit, duke u praktikuar si i tillë që nga fundi i viteve 1980.
Ndër klientët e tij spikatin emra si Bergkamp, Robinho, Balotelli, De Ligt, Donnarumma, Moise Kean.
Menaxheri italian emigroi që fëmijë në Holandë, ku u rrit dhe luajti për të rinjtë e HFC Haarlem. Raiola u bë i njohur në negociatat për nënshkrimin e sulmuesit të ri holandez të atëhershëm, Dennis Bergkamp, me Interin.
