Jorge Masvidal, që dy ditë më parë vendosi të duelojë me vetëm një javë përgatitje në eventin UFC-251 (12 korrik në Abi Dhabi) nuk do të ketë në këndin e tij trajnerin Mike Brown. Ky i fundit ka rezultuar pozitiv më Covid-19 dhe është futur në karantinë.
Brown, i cilësuar si “trajneri i vitit” nuk ka udhëtuar për në Abu Dhabi, ku në “fight island” (ishullin e luftimeve) do të zhvillohet eventi UFC-251. “Më është copëtuar zemra nga ky lajm dhe pamundësia për të qenë në krha të Jorge në këtë duel”, tha Mike Brown.
“Jorge e meriton shumë titullin kampion dhe po shkon në këtë duel pa përgatitjen e duhur, por me dëshirën për të shkruar historinë”, tha trajneri. Jorge Masvidal, që mban gjerdanin BMF (baddest mother fu**er) do të duelojë ndaj Kamaru Usman, kampionit të botës në peshën “welter”.
Pavarësisht këtij lajmi, dueli mes Masvidal dhe Usman do të zhvillohet rregullisht dhe është sfida kryesore e eventit UFC-251. Vetë Masvidal zëvendësoi në këtë duel brazilianin Gilbert Burns, që doli pozitiv me koronavirus pak ditë më parë.
