Janë 4 persona që kanë humbur jetën në 24 orët e fundit nga COVID-19, dy prej tyre për fat të keq në një moshë relativisht të re, dy gra 57-vjeçare nga Shkodra e Dibra.
Një prej tyre është Gonxhe Rexhepi, ish volejbolliste e klubit të Vllaznisë, e cila nuk mundi të fitonte betejën me koronavirusin me gjithë përpjekjet e mjekëve.
Dy personat e tjerë që humbën jetën janë një pacient 75-vjeçar nga Durrësi dhe një paciente 81-vjeçare nga Tirana.
Numri i viktimave në vend nga COVID-19 ka shkuar tashmë në 93.
Ministria e Shëndetësisë tha se situata në Spitalin Infektiv po përkeqësohet, pasi numri i rasteve është rritur, duke shtuar se vërehet me shqetësim edhe rritja e numrit të të prekurve tek moshat e reja.
Aktualisht janë të shtruar 72 pacientë në spital, 8 pacientë janë në terapi intensive në gjendje serioze dhe 4 prej tyre janë të intubuar në gjendje të rënde.
