Newcastle United u eliminua nga FA Cup nga Manchester City të dielën, por Steve Bruce ishte qartazi shumë i kënaqur me atë që e kishte parë nga Kevin De Bruyne.
De Bruyne shkëlqeu si zakonisht në fitoren mbizotëruese të City 2:0 në St James’ Park, duke e shënuar golin e parë nga penalltia në pjesën e parë, pas një faulli të Fabian Shar ndaj Gabriel Jesus.
Raheem Sterling e vulosi fitoren e cila ia siguroi skuadrës së Pep Guardiolës një vend në gjysmëfinalen e Wembley.
Aq shumë i la mbresa paraqitje a De Bruyne ish-kapitenit të Manchester United, Bruce, saqë ai tha me shaka se Newcastle do ta blinte këtë verë superyllin belg.
Trajneri i Newcastle e ndërpreu intervistën e De Bruyne pas ndeshjes dhe tha: “Ai do të qëndrojë këtu”.
“Ai do të qëndrojë këtu, do të vijë te ne – ekskluzive nga Newcastle sonte. Ai është ngopur me Manchester City dhe do të vijë të luajë për Newcastle”, shtoi ai.
