Grupi Parlamentar i Partisë Socialiste ka rënë dakord me kriteret e Partisë Demokratike për zgjedhjen e Presidentit të ri të Shqipërisë dhe i ka lënë opozitës të drejtën e propozimit të një emri konkret deri në raundin e tretë të votimit në parlament.
Kujtojmë se raundi i parë i votimit të presidentit u dogj pasi palët nuk ranë dakord për një emër konkret, ndërkohë që raundi i dytë pritet të mbahet në 23 maj.
Pas diskutimeve sot nga krerët e grupeve në fund u pranua propozimi i opozitës.
Kryetari i grupit parlamentar të PD-së Enkelejd Alibeaj duke iu drejtuar përfaqësuesve të mazhorancës kërkoi qëndrimin nëse ata janë dakord me dokumentin e dorëzuar nga opozita që të jetë kjo e fundit që të bëjë propozimet konkrete.
Kryetari i grupit parlamentar të PS-së Taulant Balla shprehu dakordësinë që deri në raundin e tretë propozimet janë të opozitës.
“Sillni propozime. Deri në raundin e tretë keni të drejtën e propozime. Ne nuk po propozojmë deri në raundin e tretë. Sillni propozimet, bëjeni si ta doni. Nëse doni të konsultoni për emrin me ne na thoni. Ramë dakord, pranohet dokumenti juaj deri në raundin e tretë”, tha Balla.
Alibeaj paralajmëroi se nëse shkelet një nga pikat e dokumentit të opozitës marrëveshja prishet.
Për të zgjedhur presidentin e ri në tre raundet e para duhen së paku 84 vota, të cilat mazhoranca e Partisë Socialiste nuk i ka.
Pas raundit të tretë, mazhoranca mund ta zgjedhë vetë Kreun e ri të Shtetit, pasi i ka 71 votat e nevojshme.
/abc24.al/
