Të shtëna me armë zjarri janë raportuar pak minuta më parë në Laç, ku si pasojë ka mbetur i plagosur një 15-vjeçar.
Uniformat blu njoftojnë se një 17-vjeçar, nxënës gjimnazi ka plagosur të miturin pas një konflikti për motive të dobëta. Sakaq, policia ka identifikuar dhe shpallur në kërkim autorin.
Njoftimi i policisë:
Kurbin/ Informacion paraprak
Rreth orës 12:20, në lagjen nr.4 në Laç, jashtë rrethimit të gjimnazit, pas një konflikti të çastit për motive të dobëta, është plagosur me armë zjarri në këmbë shtetasi i mitur L. Rr. 15 vjeç, nxënës në gjimnaz, banues në Kurbin, i cili është transportuar në spital ku ndodhet jashtë rrezikut për jetën.
Menjëherë me marrjen e njoftimit, shërbimet e policisë kanë shkuar në vendin e ngjarjes dhe falë veprimeve të shpejta hetimore, kanë identifikuar autorin e dyshuar shtetasin A.Gj. 17 vjeç, gjithashtu nxënës i gjimnazit.
Shërbimet e Policisë po vijojnë kontrollet me qëllim lokalizimin e kapjen e autorit.
Grupi hetimor nën drejtimin e prokurorit, njëkohësisht vazhdon veprimet hetimore në vendin e ngjarjes për zbardhjen e plotë të rrethanave të ngjarjes.
