Mjeket e familjes, ku çdo ditë paraqiten pacientë me viroza të stinës, alergji apo dhe sëmundje kronike, thonë se situata Covid nuk është aq e qetë sa duket.
“Situata duket e qetë, por në fakt nuk është. Ne kemi pacientë me Covid. Vijnë me shenja klinike të Covid, edhe pse tamponi del negativ”
, thotë mjekja e familjes Brunilda Shiroka.
Rapid test, i cili përdoret më së shumti për të konfirmuar nëse një pacient është i prekur nga Covid 19, nuk arrin të kapë mutacionet e reja siç është BA2, i cili qarkullon së fundmi në vendin tonë.
Në Shqipëri ka nisur tanimë vaksinimi me dozën e katërt anti Covid. Ndonëse interesi për t’u vaksinuar ka rënë, mjekja shpjegon se kjo grup moshë 60 vjeç lart janë më të interesuarit.
“Është dozë e dytë përforcuese. Ne kemi nisur me raste sporadike dhe po identifikojmë, por këta janë më të interesuarit sepse i panë benefitet e vaksinës”,
thotë mjekja.
Në Shqipëri janë vaksinuar me dozë të tretë apo 12 % e popullsisë ndërsa me dozë të parë afro 60.1 % e popullatës target.
