Karl-Heinz Rummenigge, Kryetar i Bordit të Drejtorëve të Bayern Munich, legjendë e futbollit gjerman dhe botëror, pati fjalë lavdërimi për francezin e Ousmane Dembélé, i cili ka qenë jashtë veprimi që nga shkurti për shkak të një dëmtimi të rëndë të muskujve të këmbës.
Në një intervistë për “France Football”, Rummenigge kujton se ishte i kënaqur me lojën e Dembélé, kur luajti për Borussia Dortmund, rivalin kryesor të bavarezëve në vitet e fundit të Bundesliga. “Kur ishte në Dortmund (sezoni 2016-2017), më pëlqente ta shikoja duke luajtur Ousmane Dembélé. Ai ishte një nga lojtarët e mi të preferuar”, – tha ai. Drejtuesi i lartë i Bayernit kujton se francezi ishte arkitekti i Dortmundit, që eliminoi skuadrën bavareze në gjysmëfinale të Kupës së Gjermanisë me një gol të shkëlqyeshëm. Borussia fitoi trofeun kundër Eintracht Frankfurt.
Që kur u transferua te Barcelona, Dembélé mezi ka mundur t’i shfaqë cilësitë e tij për shkak të numrit të madh të dëmtimeve të muskujve, që ka pësuar. Një fakt që e trishton Rummenigge: “Që kur u nis për te Barcelona, më vjen keq të them se përparimi i tij është ngadalësuar për shkak të shumë lëndimeve”.
Ousmane aktualisht po rikuperon një dëmtim muskulor në këmbën e djathtë. Verën e kaluar, Bayern Munich studioi mundësinë e huazimit të Dembélé për sezonin 2019-2020, por në fund zgjodhi brazilianin Philippe Coutinho, gjithashtu nga Barcelona.
