Ditë vendimtare, e enjtja, për rinisjen e kampionatit italian. Pas “samitit” mes botës së futbollit dhe qeverisë, ka tashmë një datë zyrtare për rinisjen e Serie A: 20 qershor. Për më tepër, Ministri i Sportit ka vendosur (por kjo zgjedhje duhet të miratohet edhe nga klubet) që garat të rifillojnë nga Kupa e Italisë së pari, në intervalin kohor 13 deri më 17 qershor. Një zgjedhje që, sidoqoftë, siç raportohet sot nga “Gazzetta dello Sport”, nuk i bën të lumtur veçanërisht tri klubet e mëdha italiane.
Juventusi, Milani dhe Interi janë irrituar nga ky detyrim fillestar. Ato janë skuadrat që mund të luajnë tri herë në pesë ditë, pas më shumë se tre muajsh pasiviteti. Interi drejton protestën; rifillimi i detyruar me Kupën e Italisë përcaktohet mjaft shqetësues. Aq shumë, sa për të kaluar edhe në një provokim kundërshtues: në Napoli, zikaltrit do të zbresin në fushë me ekipin e të rinjve. Gjysmëfinalja e kthimit e 14 qershorit kundër Napolit (duke filluar nga 0-1 e “San Siros”) mund të pasonte finalen e Romës. Dhe me rifillimin e kampionatit, tri ditë më vonë, laku i zikaltërve do të ngushtohej së tepërmi fizikisht.
Pra, Interi do të luante tri ndeshje me radhë, duke pasur parasysh që sfida kundër Sampdoria duhet të rikuperohet ende. Me pak fjalë, nuk janë të gjitha klubet të kënaqura, siç u duk të enjten në mbrëmje, pas njoftimit të Vincenzo Spadafora. Ndërkohë, sot do të vendoset në Këshillin e Ligës se si do të rifillohet. Mbetet të shihet nëse kampionati do të fillojë me rikuperimet e sfidave të humbura (Interi, Milani dhe Atalanta janë kundër, Liga duhet të harmonizojë renditjen sa më shpejt) ose me gjithë javën e 27-të.
Liga do të komunikojë gjithashtu kalendarin e disa raundeve të para, ndoshta dy javëve të para (fundjava e 19-20 qershorit dhe mesjava e 23-24-25 qershorit, e martë, e mërkurë dhe e enjte). Do të vendosen gjithashtu oraret, për të cilat Liga do të rihapë debatin mbi 17:15, 19:30 dhe 21:45. Skuadrat, veçanërisht nga lojtarët, do të përpiqen t’i luajnë të gjitha ndeshjet në orët e mbrëmjes.
