Prishtina importon një pikë nga Theranda, duke barazuar me rezultat 2:2 me Ballkanin, në takimin e javës së 31-të të elitës së futbollit të Kosovës.
Në 45 minutat e para, sfida mes Ballkanit dhe Prishtinës, u karakterizua me lojë shumë të mirë. Për 16 minuta u shënuan tre gola. Në minutën e 12-të, Ballkani kalon në epërsi (1:0) kundër Prishtinës. Blend Baftiu tregohet i saktë nga penalltia, 1:0 për Ballkanin.
Pas dy minutave (14′), Makenda rrëzohet nga Krasniqi dhe penallti për Prishtinën. Endrit Krasniqi godet nga penalltia por goditjen e tij e ka pritur portieri Ruxhi, topi sërish te Krasniqi i cili shënon me kokë për 1:1 në minutën e 16-të.
Në minutën 29-të, shtylla aleat i Prishtinës pas goditjes së Kuç të Ballkanit. Në minutën e 39-të, sërish Prishtina me fat, Ermal Krasniqi gjuan por topi ndalet nga shtylla e jashtme.
Në fund të pjesës së parë, Kushtrim Gashi shënon eurogol nga distanca, 2:1 për Ballkanin.
Edhe në pjesën e dytë u tregua lojë e mirë nga të dyja skuadrat. Në minutën e 60-të, sulmuesi më i rrezikshëm i prishtinasve, Oto John, me dinakërinë e tij barazon rezultatin 2:2. Ballkani është në vend të tretë me 63 pikë, ka katër më shumë se Prishtina që është një pozitë më poshtë.
