Përfundoi ditën e sotme proçesi i liçensimit të klubeve shqiptare për pjesëmarrjen në kompeticionet europiane të sezonit 2020-2021.
FSHF-ja njoftoi nëpërmjet komunikate për shtyp se kjo fazë sapo ka përfunduar, por nuk ka publikuar emrat e klubeve të liçensuara në mënyrë që të mos ndikojë në garën e këtij sezoni.
Shqipëria do të përfaqësohet sezonin e ardhshëm në kompeticionet e klubeve europiane (meshkuj dhe femra) me 6 klube.
Njoftimi i FSHF-së:
Ka përfunduar ditën e sotme procesi i licensimeve për klubet kandidate për pjesëmarrje në kompeticionet e UEFA-s në sezonin 2020-2021. Komisioni i Licensimit të Klubeve, pasi ka shqyrtuar në detaje të gjithë dosjet e skuadrave të meshkujve dhe femrave, ka marrë vendimet përfundimtare të cilat i janë komunikuar klubeve kandidate.
Klubeve i është kërkuar të mos bëjnë publik vendimin e marrë nga Komisioni në mënyrë që vendimi të mos ndikojë në garë. Pas përfundimit të kompeticioneve, Federata Shqiptare e Futbollit do të informoj grupet e interesit dhe opinionin publik mbi skuadrat që janë licensuar dhe ato klube që nuk kanë plotësuar kriteret e licensimit e i është refuzuar aplikimi.
Risia e këtij viti në procesin e licensimit është se janë përfshirë dhe skuadrat e Vllaznisë dhe Apolonisë nga futbolli femrave. Shqipëria do të përfaqësohet sezonin e ardhshëm në UEFA Champions League, UEFA Europa League, UEFA Women’s Champions League dhe UEFA Youth League me 6 skuadra.
