Juve-Inter po afrohet gjithnjë e më shumë, finalja e Kupës së Italisë, e planifikuar për sonte në mbrëmje në orën 21:00 në “Olimpico” të Romës. Zikaltrit hyjnë në ditët vendimtare të sezonit të tyre, teksa mund të ngrenë trofeun e dytë me Simone Inzaghi, pas Superkupës së fituar po ndaj skuadrës së Massimiliano Allegrit.
Trajneri i kampionëve italianë flet për ndjenjat e tij dhe mënyrën se si dëshiron ta luajë ndeshjen kundër bardhezinjve: “Detajet do të bëjnë diferencën”. Simone Inzaghi e thotë këtë në funksion të finales së sotme:
“Të jesh këtu është një krenari e madhe, ndeshja do të transmetohet në të gjithë botën, është shumë e rëndësishme. Nuk ka receta, finalet duhet të luhen me garë, agresivitet dhe vendosmëri”. Juve është kundërshtar për t’iu frikësuar: “Një kundërshtar shumë i fortë dhe cilësor, do të duhet të japim 120 për qind për të ngritur Kupën”.
Inzaghi e di se për çfarë do të luajë Interi në 15 ditët e ardhshme: “Ne dhe stafi e dimë se çfarë kemi bërë deri tani. Gjatë rrugës kemi qenë shumë të mirë, me ndonjë ngadalësim në fazën e dytë, djemtë na kanë ndjekur gjithmonë si staf teknik.
Pritshmëritë për ne janë rritur në mënyrë të pashmangshme gjatë muajve. Në janar fituam trofeun e parë, tani do të kemi këtë ndeshje shumë të rëndësishme me Juven dhe më pas në dy javët e fundit të kampionatit do të luajmë për titullin.
Kemi bërë një punë të shkëlqyer falë klubit, ekipit dhe tifozëve. Më 8 korrik, kur e mora këtë detyrë, nuk e prisja gjithë këtë. Të gjithë sezonin ia kam borxh skuadrës që më ka ndjekur gjithmonë dhe stafit. Sezoni ishte i mrekullueshëm, sot luajmë ndeshjen e 50-të. Në këtë sezon kemi luajtur futboll të shkëlqyeshëm për 7-8 muaj, pastaj patëm një rënie me 7 pikë në 7 ndeshje”.
Inzaghi shton se finalja e Kupës do të ishte ideale pas mbarimit të kampionatit: “Do të kishim dashur ta luanim këtë finale pas dy ndeshjeve të fundit të Serie A, por tani nuk e kemi problem. Jam përshtatur gjithmonë, edhe si futbollist.
Finalet janë të gjitha shumë të rëndësishme, si trajner kam luajtur tashmë disa. Do të duhet të luajmë një lojë me vëmendje, garë, vendosmëri, duke ditur se do të kemi përballë një kundërshtar të vlefshëm”.
Juventusin e ka pasur tashmë tri herë kundërshtar këtë sezon: “Dhe ato ishin tri ndeshje të ndryshme nga njëra-tjetra. Sot do të jetë lojë e hapur, me shumë cilësi në fushë. Duhet të gabojmë sa më pak të jetë e mundur, sepse episodet e vogla vendosin finalen.
Duhet të vendosim zemrën në fushë. E kemi bërë këtë gjatë gjithë sezonit. Në 50 ndeshje kemi dhënë gjithmonë gjithçka në fushë, në 5-6 prej tyre kemi humbur, në 44 të tjera kemi bërë shumë mirë”.
Inzaghi do të luajë në shtëpi për shumë arsye: “Olimpico do të jetë një emocion i veçantë, do të shoh njerëz që më donin. Tani jam krenar që jam në një klub dhe ekip të madh”.
