“I thashë mamit dhe motrës sime. Të nesërmen luajtëm në Accrington dhe shënova katër gola, vetëm për të kuptuar se çfarë peshe kisha hequr nga supet”. Janë këto fjalët e sulmuesit të Blackpool, Jake Daniels, futbollisti i parë profesionist në Mbretërinë e Bashkuar që deklarohet publikisht homoseksual që nga Justin Fashanu (1990).
Jake deshi kështu të deklarohej për prindërit, klubin dhe shokët e skuadrës. E bëri nga dëshira për të qenë i sinqertë dhe për të jetuar jetën e tij pa gënjeshtra. Jake Daniels është vetëm 17 vjeç dhe bëri debutimin e tij në Championship kundër Peterborough, duke hyrë në ndeshjen e fundit të kampionatit.
Megjithatë, Daniels kishte lënë gjurmë në ekipet e të rinjve, duke e mbyllur sezonin me 30 gola për U-19. Daniels postoi një letër në rrjetet sociale, në të cilën shpjegoi zgjedhjen e tij: “Tani është koha e duhur për ta bërë këtë. Ndihem gati t’u tregoj njerëzve historinë time.
Unë dua që njerëzit të dinë të vërtetën për mua. Mendova për një kohë të gjatë si ta bëj, kur ta bëj. E di që tani është koha. Jam gati të jem vetvetja, të jem i lirë dhe të kem besim në gjithçka. Ndoshta isha pesë ose gjashtë vjeç kur kuptova se isha ‘gay’. Pra, prej kohësh jetoj bashkë me këtë makth.
Në atë moshë nuk mendoni se futbolli dhe të qenit ‘gay’ përzihen. Thjesht mendoni se një ditë, kur të rriteni, do të keni një të dashur, do të ndryshoni dhe gjithçka do të jetë mirë. Por, ndërsa rritesh kupton se nuk mund të ndryshosh kaq thjesht. Nuk funksionon kështu.
Unë kam pasur vajza në të kaluarën, duke u përpjekur t’i bëj të gjithë miqtë e mi të mendojnë se isha si të tjerët, por kjo ishte thjesht një gënjeshtër e madhe. Në shkollë më kanë pyetur gjithashtu: A je i sigurt që nuk je ‘gay’? Dhe unë thoja: Jo, nuk jam. Nuk isha gati, kisha një luftë të brendshme, por nuk dua të gënjej më.
Për një kohë të gjatë mendoja se duhej ta fshihja të vërtetën time sepse doja të isha dhe tani jam një futbollist profesionist. Pyesja veten nëse duhej të prisja derisa të ‘pensionohesha’ nga futbolli. Asnjë lojtar tjetër profesionist aktiv nuk e ka bërë këtë. Megjithatë, e dija se kjo do të çonte në gënjeshtra; nuk do të isha vetvetja dhe të bëja jetën që dua.
Nuk duhet të shqetësohesha për reagimet. Kam marrë kaq shumë mesazhe, që më thonë: Ne jemi krenarë dhe qëndrojmë në solidaritet. Ishte fantastike. Blackpool ishte gjithashtu absolutisht fantastik. U ndjeva i sigurt.
Shokët e skuadrës ishin të gjithë kaq mbështetës për këtë dhe të gjithë më inkurajuan. Ata bënë shumë pyetje, të gjithë ishin të intriguar, por reagimi i tyre ishte i mrekullueshëm. Kjo ishte gjëja më e mirë që mund të kisha kërkuar”.
