“Sot, një trofe për të shpëtuar sezonin? Mbetem i qetë, për ta fituar atë do të duhet durim dhe qartësi”. Pak minuta pas përfundimit të konferencës së Interit, mbërriti edhe ajo e Juventusit, e drejtuar nga Massimiliano Allegri, së bashku me Giorgio Chiellini, kapitenin bardhezi, ashtu siç ishte edhe Samir Handanovic për ngjyrat zikaltër.
Trajneri nga Livorno vazhdon: “Do të luajmë kundër një prej skuadrave më të mira në Serie A. Është ende Juve-Inter, një ndeshje që ka qenë gjithmonë shumë e ekuilibruar. Më pas ndoshta episodi i duhur vjen pas 2 minutave të para dhe ndeshja zhbllokohet. Është e rëndësishme ta përballojmë ndeshjen me qetësi dhe kompaktësi”.
Finalja e Kupës së Italisë, për Juventusin, herët e tjera do të ishte ‘qershia mbi tortë’: “Tani është torta, kështu që ne do të bëjmë gjithçka për ta marrë këtë trofe në shtëpi. Duhet të jemi të vetëdijshëm për mjetet tona dhe të kthjellët. Është e rëndësishme të fillojmë sërish të fitojmë trofe”.
Më pas, Allegri iu përgjigj pyetjes më urgjente të kësaj periudhe të fundit: A e shpëton sezonin bardhezi Kupa e Italisë? “Ne e nisëm keq dhe patëm një ecuri të gjatë me zig-zage. Dolëm shpejt nga Liga e Kampionëve, por çdo vit përpiqemi të përmirësohemi.
Kupa e Italisë? E di tashmë: nëse e fitojmë, do të dëgjojmë se është vetëm Kupa e Italisë. Nëse e humbasim, do të jetë një sezon katastrofik për Juventusin. Ne, në ekip dhe në klub bëjmë vlerësime të ndryshme.
Sezoni ynë? E nisëm me largimin e Cristiano Ronaldos, më pas na u desh të merreshim me shumë dëmtime të rëndësishme. Meqë ra fjala, për sot i kam thirrur të gjithë, përfshirë Chiesa dhe McKennie. Tani duhet të mendojmë për ta fituar këtë finale. Vlahovic? Shpresoj të shënojë dy gola”.
Dhe në fund: “Trajneri më i mirë italian? Janë të shumtë: Lippi, Capello, Sacchi, Ancelotti. Carlon e kam uruar, është i vetmi nga këto që stërvitet edhe sot (Allegri do të citonte në fund të konferencës, pas një harrese, edhe Trapattonin)”.
