Sulmuesi i Shqipërisë dhe Hibernianit, Florian Kamberi, mund të vazhdojë karrierën në Zvicër. Mediat skoceze shkruajnë se futbollisti, i cili luajti në pjesën e dytë të sezonit i huazuar te Glasgou Rejnxhërs, është kthyer në Zvicër pranë familjes dhe do të vendosë njëherë e mirë për të ardhmen.
Hiberniani nuk e ka përfshirë në listë për ndeshjet parapërgatitore për sezonin e ri. Ndërkohë, në Zvicër, Sent Galeni ka shfaqur interes për Kamberin. Qëndrimi i tij te Hiberniani është thuajse i pamundur, kjo edhe për shkak të komenteve të bëra nga lojtari gjatë kalimit në janar te Rejnxhërs.
“Realizova ëndrrën duke kaluar te Rejnxhërsi”, deklaratë e cila nuk u prit mirë nga drejtuesit e Hibernianit.
Sulmuesi kërkon një klub ku të ketë mundësinë për të luajtur rregullisht, në mënyrë që të grumbullohet në Kombëtaren kuqezi.
