Shqipëria nuk rrezikon ndërprerje në furnizimin me grurë dhe me miell pasi rezervat aktualisht janë 40 mijë tonë. Megjithatë tregtuesit thonë se edhe vendi ynë nuk bën përjashtim nga rritja e çmimeve si pasojë e kostove të shtuara nga karburanti dhe aplikimi I TVSH-së. Sa i përket heqjes së bllokadës nga Serbia, Kryetari i Unionit Tregtar Agroushqimor (UTA) Theodhor Kristuli thotë se duhen parë çmimet me të cilat do të ofrohet produkti.
Tregtuesit e miellit qetësojnë edhe njëherë qytetarët duke njoftuar se kanë mbi 40 mijë ton rezerva ndërsa paralajmërojnë se pavarësisht se nuk rrezikohet ndërprerja e furnizimeve, problem do të jenë çmimet.
Kryetari i Unionit Tregtar Agroushqimor (UTA), Theodhor Kristuli shprehet se çmimi i lartë i energjisë elektrike, çmimi i naftës dhe TVSH-ja do të pasqyrohen në çmimin fundor tek konsumatori.
“Minimalisht duhet fiksuar TVSH-ja, sepse bursa mund të shkojë 3-fish, 5-fish. Do marrësh 5 herë ti më tepër”, t
hotë Kristuli.
Kristuli nënvizon se është e nevojshme ndërhyrja e qeverisë me qëllim ruajtjen e rezervave dhe vijimësinë e furnizimit me grurë.
“Rezerva duhet të jetë rezervë. Unë duhet ta kem atë rezervë brenda, nuk duhet lënë deri në momentin që ajo të shitet komplet”,
shtoi ai.
Çmimi i bursës ka pësuar një ulje por kostoja e rritur e transportit është një tjetër problematikë.
“Nga 73 dollarë që ka qenë, është rritur 4 dollarë për ton. Transporti në Evropë është rritur me 2.75 të tjera”
, tha Kristuli.
Prandaj, tregtarët kanë parë të arsyeshme të përdorin grurin rezervë derisa të sigurohet një treg me çmime të arsyeshme.
Sa i përket paralajmërimit të Serbisë për të rinisur furnizimin me miell, tregtarët e miellit thonë se mbetet për tu parë nëse produkti do të ofrohet me të njëjtin çmim si më parë.
“Problemi është ishalla Serbia na i jep me çmimet pak a shumë që e kemi marrë gjithmonë”,
tha Kristuli.
Nëse çmimi i bursës dhe elementët e matjes së xhiros nuk do të ulen, Kristuli thotë se kjo mund të reflektohet në rritjen e mëtejshme çmimeve të produkteve të grurit.