Lazio nuk u ndahet shqiptarëve. Marash Kumbulla mbetet një objektiv, por nuk është i vetmi që klubi italian do. Së fundmi ata po tentojnë të transferojnë edhe Mërgim Vojvodën, mbrojtësin e djathtë që është aktivizuar në të shkuarën me Shqipërinë U21 dhe më pas kaloi te Kosova.
Titullari i përfaqësueses dardane kaloi verën e shkuar te Standard Liege dhe aty spikati me daljet e tij përpara. Vojvoda u aktivizua në 25 ndeshje dhe klubi belg kishte paguar 1.2 milion euro te Mouscron për ta transferuar anësorin e krahut të djathtë.
Nga Belgjika vjen lajmi se Standard Liege tani kërkon 7 milion euro për Vojvodën, që Lazio e shikon si pasuesin e Adam Marusic. Malazezi mund të kalojë te PSG dhe Igli Tare ka piketuar lojtarin dardan për ta pasuar.
Vlonjati duhet të bindë edhe Adrian Aliajn, mikun e tij te kombëtarja shqiptare, i cili është menaxheri i Vojvodës. Më parë ai është shprehur se klientin e tij e duan në Itali, por normalisht çdo klub duhet të paguajë, pasi mbrojtësi është nën kontratë deri në vitin 2023..
