Sulmuesi francez së shpejti do të komunikojë zyrtarisht vendimin e tij, pas disa muajsh deklaratash dhe thashethemesh për rinovimin e tij. I cilësuar si top-lojtari i Ligue 1 (sezoni 2021-2022) dhe i përfshirë në ekipin ideal, në margjina të ceremonisë së ndarjes së çmimeve, Mbappé foli për mikrofonat e shtypit të pranishëm, duke vënë në dukje situatën: “Tri vite më parë, kur fola në këtë ceremoni bëra një gabim të rëndë, të cilin nuk do ta përsëris. Vendimi për të ardhmen time është pothuajse i marrë dhe do të shpallet së shpejti”.
Përtej këtyre fjalive, ka një temë për të cilën Mbappé duket se është ekspozuar veçanërisht. I pyetur për mundësinë e tejkalimit të rekordit të golave të Cavanit, në krye të 200 golave, sulmuesi francez u përgjigj pa i kursyer fjalët: “Rekordi i golave të Cavanit? Jam i kënaqur me podiumin”.
Gjithashtu, për shkak se ndalet në 168 gola, me 32 gola diferencë, një përgjigje e tillë mund të nënkuptojë vetëm një gjë: merkato, pra, do të zbulojë pjesën tjetër.
Ndërkohë, spanjollja “Marca” e ka bërë fakt të kryer marrëveshjen finale mes Real Madridit dhe yllit francez: “Kylian Mbappé e ka vendosur tashmë të ardhmen e tij. Ai e tha këtë në galanë e futbollit francez, të mbajtur mbrëmjen e së dielës, 15 maj. E ardhmja e tij kalon përmes Real Madridit. Sulmuesi dhe Real Madridi e mbyllën marrëveshjen javën e kaluar.
Ata vulosën gjithçka që u fol në muajt e fundit, kohë në të cilat Mbappe ka marrë lloj-lloj presionesh, duke filluar nga ato të ushtruara nga drejtuesit e klubit të tij, pastaj nga tifozët dhe duke përfunduar nga politikanët me Macron në krye.
Ai nuk ka dyshuar kurrë, por ato presione, disa të shoqëruara me para shumë larg çdo logjike futbollistike, kanë arritur të krijojnë tension dhe momente të vështira për t’u përballuar. Taktikat e Florentino Pérez kanë qenë shumë të thjeshta gjatë gjithë sezonit.
Ai nuk ka kërkuar një parakontratë të firmosur, gjithçka e ka bazuar në përkushtimin dhe dëshirën e futbollistit për të luajtur për Real Madridin. Klubi i bardhë ka qenë gjithmonë aty, në hije dhe duke përdorur njerëz kyç, të afërt me kampionin e botës”.
