Pas kaq muajsh pa të ardhura nga turizmi, destinacione në mbarë botën po bëjnë ç`është e mundur për të tërhequr vizitorët e frikësuar prej pandemisë së koronavirusit. Kankuni në juglindje të Meksikës ka nisur fushatën “ 2 në një” me dy netë qëndrimi falas për çdo dy netë të paguara dhe rimbursim për një biletë avioni që klientët të marrin dikë me vete.
Në Tajlandë, hoteli i luksit Cape Fahn, ofron super oferta për vilat e tij të shtrenjta me pishina. Bullgaria nuk i merr para të huajve për çadrat e plazhit dhe shezlongët, në Gjenevë është ndërmarrë nisma “ Geneva Boxes”, e cila sjell paketa me qëndrim në hotel dhe eksperienca në qytet me ulje deri në 65%.
Por që t`i bindë vizitorët se është një destinacion i sigurtë, Uzbekistani ka shkuar deri aty sa të ofrojë një shume të majme për vizitorët që infektohen nga koronavirusi gjatë pushimeve në këtë vend. Për turistët që preken nga Covid-19 ndërsa pushojnë atje, premtohet shuma e 3.000 dollarëve.
Edhe Qipro, që i hapi kufijtë e saj për disa shtete të caktuara në muajin qershor, zotohet të mbulojë kostot e qëndrimit, ushqimit, pijeve dhe mjekimit për vizitorët që rezultojnë pozitivë ndaj virusit gjatë qëndrimit të tyre në ishull.
Burimi: top-channel.tv
