Ministria e Bujqësisë në Shqipëri ka sqaruar sot opinion publik pas rastit të raportuar në media për ngordhjen e një numri të konsiderueshëm të shpendëve në dy pulari në qytetin e Durrësit. Sipas një njoftimi për shtyp, ministria ka shtuar se pas raportimit të rastit në Durrës, sektori i shërbimit veterinar ka marrë masat për shqyrtimin e situatës në vend, gjurmimin, kampionimin zyrtar dhe dërgimin e tyre në Institutin e Sigurisë Ushqimore dhe Veterinarisë (ISUV). “Deri më tani raportohen rreth 200 mijë shpendë të ngordhura. Janë kryer pranë ISUV analizat në bazë të mostrave të marra. Sipas të dhënave të deritanishme rezultatet tregojnë sëmundjen e Laringotrakeitit infektiv në shpendë”, ka thënë ministria. “Është një sëmundje që prek kryesisht shpendët. Laringotrakeiti infektiv nuk është një sëmundje zoonotike dhe nuk transmetohet te njerëzit dhe as nëpërmjet produkteve ushqimore nga shpendët, për pasojë nuk përbën rrezik për shëndetin publik”, sipas ministrisë. “Është e rëndësishme të theksojmë dhe të sigurojmë konsumatorët se deri më tani nuk ka asnjë rast ku të jetë shfaqur influence aviare (gripi i shpendëve)”, ka shtuar ministria. “Në subjektet e tjera shpendrritëse për vezë e mish, në të gjithë territorin e vendit, AKVMB ka marrë masa të menjëhershme për parandalimin e përhapjes së sëmundueshmërisë dhe deri më tani nuk është raportuar asnjë rast”, ka thënë në fund të njoftimit ministria.
/abc24.al/
