Një 26-vjeçare është proceduar penalisht nga policia në Rinas pasi nuk ka deklaruar një shumë e konsiderueshme parash.
Uniformat blu raportojnë se gjatë kontrollit të ushtruar, shtetases E.S., iu gjetën në valixhe 15 mijë paund të padeklaruara. Mësohet se e reja kishte udhëtuar nga Anglia drejt Shqipërisë.
Njoftimi i policisë:
Rinas
Evidentohet dhe goditet një rast i mosdeklarimit të të hollave.
Sekuestrohen 15 000 paund, procedohet penalisht 26-vjeçarja që nuk i deklaroi.
Shërbimet e Policisë Kufitare Rinas, në vijim të kontrolleve të shtuara për evidentimin dhe goditjen e paligjshmërive, kanë kaluar për kontroll të detajuar bagazhet e shtetases E. S., që kishte udhëtuar nga Anglia në drejtim të Shqipërisë.
Gjatë kontrollit të valixhes së kësaj shtetaseje janë gjetur 15 000 paund, të cilat ajo nuk i kishte deklaruar, sipas përcaktimeve ligjore.
Në vijim të veprimeve u sekuestrua shuma e parave dhe u referuan materialet në prokurori, në ngarkim të shtetases E. S., 26 vjeçe, lindur në Kosovë dhe banuese në Austri, për veprën penale “Mosdeklarimi në kufi i të hollave dhe i sendeve me vlerë”.
