Sot është dita e 12-të pas operacionit. Data e fillimit të numërimit? 25 maj, atëherë kur Zlatan Ibrahimovic kreu ndërhyrjen kirurgjikale në Lyon. Doktori Bertrand Sonnery-Cottet praktikisht i dha atij një gju të ri të majtë: rindërtimi i ligamentit të kryqëzuar anterior, përforcimi anësor dhe riparimi i meniskut.
Sot është dita e 12-të dhe ne po fillojmë të shkojmë në thelbin e çështjes, sepse Zlatan dhe Milan i kishin thënë lamtumirë njëri-tjetrit dhe mbetën në marrëveshje për ta përditësuar situatën disa javë pas ndërhyrjes. Pra, ja ku jemi. Sapo Maldini dhe Massara të kthehen nga Ibiza, mes detyrave të ndryshme në rend dite do të jetë edhe një pikë e situatës me suedezin.
E cila do të duhet të tregojë diçka të thjeshtë në përmbajtje dhe në të njëjtën kohë të ndërlikuar në menaxhim: si është, si po shkon rikuperimi, cila do të jetë e ardhmja e suedezit. Pyetje ‘qindra- milionë dollarëshe’ do të marrë përgjigje pjesërisht bazuar në atë se si shkuan këto ditë të para të rikuperimit. Përgjigje padyshim të pjesshme, por gjithsesi të dobishme dhe të nevojshme për një reflektim të parë.
Qëndrimi i Milanit për të ardhmen e Ibrës ka qenë i qartë prej disa kohësh: nuk ka asnjë pengesë për të vazhduar një sezon tjetër me “totemin” që ka pasur ndikim të konsiderueshëm në rrugën e titullit. Natyrisht ridiskutimi i kushteve të marrëveshjes mbetet i hapur, sepse, nëse nuk ka komplikime dhe rikuperimi vazhdon sipas planit, Zlatan do të jetë sërish i disponueshëm vetëm në janar 2023.
Kjo është arsyeja pse midis hipotezave në tryezë është edhe ajo e një kontrate simbolike, ose bazuar në numrin e paraqitjeve dhe padyshim e pasuruar nga bonuse të tjera individuale (numri i golave) dhe shpërblimet ekipore. Ndërkohë, suedezi sundohet nga frika. Më shumë nga terrori i largimit nga bota që e bëri atë të bëhej Zlatan, në kuptimin e plotë të fjalës.
Ky është motivimi që e shtyu atë disa muaj nga mosha 41-vjeçare t’i nënshtrohej një rikonstruksioni të gjurit për t’i dhënë vetes një tjetër mundësi për të qëndruar në fushë. Më pas, mund të hapet çdo lloj skenari: te Milani mund të bëhet ambasador si Baresi, të ndihmojë Piolin në fushë, ndoshta edhe menaxherin e klubit.
Po kështu mund t’i besohet një rol në Federatën Suedeze të Futbollit apo edhe të nisë një aventurë si menaxher futbollistësh. Fjala kyçe është kjo, sepse tani ajo që ka rëndësi është “përpara”. Para operacionit, por edhe pas operacionit, thonë se Zlatan vazhdon të jetë shumë i motivuar për të ecur përpara si futbollist. Dhe këtë do t’ia thotë së shpejti edhe Maldinit e Massarës.
