Idriz Humolli, themelues i Bodibildingut dhe fitnesit të Kosovës, përmes një shkrimit në profilin e tij në facebook, iu drejtohet opinionit sportiv.
“Për të gjithë Udhëheqësit e Klubeve të Bodibildingut dhe Fitnesit të Republikës të Kosovës, Udhëheqësinë e Federatës, Bordin dhe anëtarët e Kuvendit të saj, trajnerët, garuesit dhe entuziastët tjerë.
Ne përfaqësuesit e fitneseve sot u takuam me Ministren e Kulturës, Rinisë dhe Sporteve të Kosovës zonj. Vlora Dumoshi dhe Drejtorin e Departamentit të Sportit të Kosovës Ibër Alaj, ku paraqitëm nevojën, arsyeshmërinë dhe domosdoshmërinë e rihapjes së fitneseve, duke dhënë argumente të shumta e të pa kontestuara.
Ministrja u zotua se kërkesa jonë e sotit dhe ajo me shkrim e cila dje është dorëzua në Departament të Sportit dhe Komitetin Olimpik, do të merret shumë seriozisht dhe se e njëjta do të paraqitet për shqyrtim në Institutin e Shëndetit Publik të Kosovës ditën e shtune, dhe mbi bazën e saj do të njoftohemi në kohën e duhur.
Unë shfrytëzova rastin që pos kërkesës për rihapje, ta njoftoj Ministren dhe Drejtorin e Departamentit të Sportit, se në kuadër dhe me qëllim të fuqizimit dhe organizimit të përgjithshëm të klubeve si dhe Federatës tashmë kam bërë disa përgatitje për inicimin dhe themelimin e
Shoqatës së Bodibildingut dhe Fitnesit të Kosovës.
Për nevojën, rolin dhe rëndësinë e kësaj Shoqate besoj se nuk ka nevojë për sqarime shtesë.
Të nderuar, ju lutem që të dërgoni komentet tuaja (besoj konstruktive) , për këtë iniciativë, mbi bazën e të cilave të gjithë së bashku të fillojmë ecjen përpara dhe jetësimin e kësaj nisme për të cilën edhe djali im Besniku ka kontribua shumë.
Jam i bindur se ky inicim është shumë i nevojshëm për nivelin e zhvillimit të Bodibildingut dhe Fitnesit të Kosovës.
Besoj se jemi, nëse jo të parët në rajon, atëherë sigurisht ndër të parët në këtë drejtim”, ka shkruar Humolli.
