Në zgjedhjet e ardhshme në Turqi do të jenë gjashtë milionë votues të cilët do t’i drejtohen kutive të votimit për herë të parë. Këta 6 milionë do të vendosin nëse do t’ia zgjasin pushtetin Recep Tayip Erdoganit apo nëse do të zgjedhin diçka të cilën s’e kanë njohur kurrë- Turqinë pa Erdoganin, shkruan Reuters, transmeton Gazeta Express.
Më pak se 12 muaj larg nga ndoshta zgjedhjet më të mëdha në historinë moderne të Turqisë, një shumicë e madhe e turqve të rinj thonë se duan ndryshim, por mbeten disi skeptikë se opozita mund të përmirësojë siç duhet situatën e punës, shkollat dhe liritë si lirinë e fjalës.
Në rreth 12% të të gjithë votuesve në zgjedhjet presidenciale dhe parlamentare të vendosura për në qershor 2023, rinia do të jetë vendimtare në atë që po formohet si një garë shumë e ngushtë për Erdoganin dhe Partinë e tij në pushtet AK, thonë anketuesit.
Intervistat me turq nga 18-23 vjeç, nga Stambolli metropolitane në Anadollin qendror, tregojnë se drejtësia, emigracioni, punët e bazuara në merita dhe politikat ekonomike transparente janë prioritete.
Trazirat ekonomike dhe rritja e inflacionit i kanë rritur kostot e jetesës për të gjithë.
Kreu i Kompanisë së sondazheve tha se votuesit e rinj në përgjithësi janë të mërzitur nga qeveria, por nuk janë të lidhur nga një ideologji specifike dhe nuk i besojnë plotësisht opozitës.
Sondazhet e tij tregojnë se votuesit e “gjeneratës Z” të moshës 18-25 vjeç kundërshtojnë ashpër masat e shtypjes ndaj stilit të jetesës, shprehjes së lirë dhe medias. “80% e kësaj gjenerate nuk do të votojnë për AK-në”, tha ai.
