Pandemia solli më pak të ardhura në familjet shqiptare, sa herë që vendi ynë preket nga një krizë ekonomike familjet shqiptare rrisin shpenzimet për bukë dhe drithëra.
Sipas të dhënave nga Eurostat familjet shqiptare vijuan të mbanin rekordin e shpenzimeve për bukë në Europë edhe për vitin 2021. Në një tregues të varfërisë, shpenzimet nominale për bukë dhe drithëra për vitin 2021 ishin sa 4.3% e Prodhimit të Brendshëm Bruto, nga 1.1% që është mesatarja e Bashkimit Europian.
Pas Shqipërisë, shtetet që shpenzojnë më tepër për drithëra renditen Mali i Zi, Bosnja dhe Rumania. Buka vazhdon të mbetet ushqimi i të varfërve, nëse shohim grafikun e Eurostat, vendet që kanë konsumuar më pak bukë janë shtetet e pasura si Danimarka, Suedia, Gjermani, Finlanda dhe Zvicra, ku më pak se 1% e PBB shpenzohet për bukë dhe drithëra.
“Në jemi një vend i varfër ku paga bruto nuk shkon më tepër se 550 euro në muaj, kjo do të thotë që familjet shqiptarë më parë kërkojnë të sigurojnë bukë atë që u mban frymën gjallë, paralelisht mbeten shumë pak para për t’i harxhuar për shpenzimet e tjera”, thotë eksperti i ekonomisë, Mirdaim Axhami.
Edhe për grupin “Ushqime dhe pije jo alkoolike”, Shqipëria sërish mban rekord në raport me të ardhurat.Gati një e treta e të ardhurave që krijon ekonomia vendase në një vit shkon për tu ushqyer. Sipas Eurostat, shpenzimet nominale për ushqime dhe pije jo alkoolike, ndaj PBB-së, në vitin 2021 për Shqipërinë ishin 31.6% e PBB-së, nga 7.1% që është ky tregues për mesataren e bashkimit Europian. Shteti i dytë që është pas Shqipërisë, Mali e Zi, e ka këtë tregues 23.7%.
“Të ardhurat e paktë bëjnë që zërin kryesore ta zënë ushqimet që kanë një çmim tepër të lartë. Madje parashikoj që në vitin 2022 këto shifra do të jenë edhe më të frikshme, pas ushqimet kushtojnë më tepër. Për pasojë shqiptarëve nuk u dalin të ardhurat t’i shpenzojnë për veshje apo sport, apo dëfrim”, shpjegon Axhami.
Çmimet e larta dhe paka e ulët, bën që zërin kryesore të shpenzimeve mujore tek familjet shqiptarë ta këtë sektori i bukë dhe ushqimet e shportës, çmimi i të cilave u rrit ndjeshëm pas luftës në Ukrainë./TCH
