Kanë kaluar pak më shumë se dy vite e gjysmë që kur Mauro Icardi u largua nga Interi për t’u bërë anëtar i dhomës së zhveshjes galaktike të Paris Saint Germain, por largimi i tij jehon ende në Itali. Wanda Nara, gruaja dhe agjentja e sulmuesit argjentinas u kthye në Milano për të dëshmuar si palë civile në gjyqin për shpifje kundër gazetarit Fabrizio Corona, të cilin e akuzon se kishte shpikur një lidhje me një ish-bashkëlojtar të burrit të saj.
Corona, i njohur si ‘mbreti i paparacëve’, kishte publikuar një artikull në faqen e internetit “King Corona Magazinè” në shkurt 2019, ku thuhej se Mauro Icardi po divorcohej nga Wanda Nara sepse ajo po e tradhtonte me Marcelo Brozovic, futbollistin kroat, i cili ishte bashkëlojtar i Maurito dhe është ende në radhët e skuadrës zikaltër.
“Pas atij artikulli që raportonte gjithë ato gjëra të pavërteta filluan problemet dhe Mauro, i cili u detyrua të ndryshonte ekip. Interi u ndikua shumë nga ajo pseudo situatë, i kërkoi Icardit të ndryshonte edhe agjentin e tij”, – deklaroi Wanda në gjyq, sipas agjencisë italiane ANSA.
Biznesmenja dhe modelja argjentinase shpjegoi para gjyqtares Elisabetta Canevini se ky informacion i publikuar nga Fabrizio Corona shkaktoi vuajtje në familje dhe shkaktoi një distancim të tifozëve e drejtuesve të Interit me Icardin.
“Kam 5 fëmijë që kanë shkuar në shkollë këtu në Milano në atë periudhë. Aty filloi edhe hendeku i madh mes Icardit, tifozëve të klubit dhe drejtuesve. Ne jemi një familje tradicionale dhe kjo histori na ka sjellë probleme brenda dhe jashtë familjes”, – ka shpjeguar Wanda, e cila theksoi se është ende agjentja e sulmuesit të PSG-së. Ajo iu tha gazetarëve jashtë gjykatës se “Milano është shtëpia jonë”.
Prokurori fillimisht kishte kërkuar mbylljen e hetimeve, por futbollisti Marcelo Brozovic, i këshilluar nga avokati i tij, e kundërshtoi dhe i dha rrugë gjyqit ndaj Fabrizio Corona. Një tjetër gjyq po zhvillohet në Milano kundër tre gazetarëve të akuzuar se kanë përhapur lajmin për lidhjen e dyshuar mes Wanda Narës dhe Brozovic.
“Askush nuk mund ta kuptojë se nga e kanë marrë këtë histori të rreme. Asnjëherë nuk e kam pasur numrin e Brozovicit, ai nuk ishte as një person me të cilin shoqëroheshim, siç ndodh midis miqve në një ekip”, – tha Nara.
Ai artikull i diskutueshëm gazetaresk i botuar në faqen e internetit të Corona theksonte gjithashtu se Brozovic kishte pësuar “sulme të dhunshme” nga Mauro Icardi, i cili në atë kohë ishte një nga kapitenët e ekipit. Në seancën e radhës, e cila është caktuar për më 25 maj, si palë civile do të dëgjohen Brozovic, Icardi, Wanda Nara si dhe lojtari kroat Ivan Perisic.
