Një total prej 23.5 milionë kërkesash janë paraqitur në periudhën e fundit të shitjes së biletave me përzgjedhje të rastësishme për Kupën e Botës “Katar 2022”, proces i cili u mbyll dje. Ky Botëror premton të jetë vërtet global, me tifozët e futbollit nga vendi pritës dhe anembanë globit që kërkojnë bileta.
Përveç tifozëve vendas, kërkesat kryesore kanë ardhur nga mbështetësit e Argjentinës, Brazilit, Anglisë, Francës, Meksikës, Arabisë Saudite dhe SHBA-së. Biletat e ndeshjeve mes Argjentinës dhe Meksikës, Argjentinës dhe Arabisë Saudite, Anglisë dhe SHBA-së, Polonisë kundër Argjentinës ishin më të kërkuarat.
Departamenti i Biletave të FIFA-s tani do të verifikojë nëse kërkesat plotësojnë rregulloret e shitjes dhe kufizimet shtëpiake përpara se t’i ndajnë ato. Një short përzgjedhjeje e rastësishme do të bëhet nëse kërkesat kanë tejkaluar inventarin e disponueshëm të biletave.
Ata që kanë aplikuar do të marrin një njoftim mbi rezultatin me email nga 31 maji, që përkon me fillimin e periudhës së planifikuar të pagesës. Kartat Visa mund të përdoren për pagesa nga shtetasit e Katarit, ndërsa kartat e tjera të pagesës do të pranohen për tifozët ndërkombëtarë.
Aplikantët e suksesshëm që kryejnë pagesën mund të aplikojnë për një kartë Hayya, lejen e hyrjes në shtetin e Katarit dhe hyrjen në stadium përmes “Qatar2022.qa”. Periudha e ardhshme e shitjes së biletave do të shpallet së shpejti. Kupa e Botës në Katar është planifikuar të mbahet nga 21 nëntori deri më 18 dhjetor.
