Audicioni i parë i Susan Boyle është shpallur momenti më domethënës në historinë e spektaklit ‘Britain’s Got Talent’, me 71 për qind të votave të publikut.
Këngëtarja skoceze tronditi anëtarët e jurisë dhe publikun me zërin e saj të fuqishëm kur interpretoi drejtpërdrejtë këngën “I Dreamed A Dream” nga filmi “Les Miserables”.
“Pa dyshim, ishte befasi më e madhe që kam pasur në tre vitet e këtij konkursi. Kjo ishte e mahnitshme, një performancë e pabesueshme. Po dridhem nga shoku”, ishin fjalët e anëtarit të jurisë, Piers Morgan.
Ndërsa Amanda Holden shtoi se ishte një moment shumë ngazëllyes dhe se ndihej e privilegjuar që e ka dëgjuar.
Interpretimi i saj shumë shpejt u bë viral në mbarë botën dhe ajo arriti në finalen e spektaklit, duke zënë vendin e dytë pas trupës së kërcimit “Diversity”.
Albumi debutues i Susan, “I Dreamed A Dream”, u bë albumi debutues më i shitur i të gjitha kohërave në Mbretërinë e Bashkuar dhe vendosi një rekord shitjesh në javën e parë, sipas Official Charts Comapny.
Boyle është bërë një nga konkurrentet më të suksesshme të spektaklit “Britain’s Got Talent” dhe ka shitur mbi 19 milionë albume në mbarë botën. /
abc24.al
/
