Bandat kriminale shqiptare janë në rritje në Mbretërinë e Bashkuar dhe dërgojnë qindra miliona paund të ardhura kriminale në Shqipëri çdo vit, sipas një investigimi të GB News.
Burime zyrtare i kanë thënë medias së huaj se një sërë biznesesh të ndryshme përdoren shpesh për të pastruar paratë, por shumica e të ardhurave nga krimi thjesht kthehen në Shqipëri përmes personave ose me automjete. Së fundmi 300,000 paund u gjetën në bagazhe në një aeroport në Mbretërinë e Bashkuar, me destinacion kryeqytetin shqiptar, Tiranën.
Në një incident tjetër, oficerët e kufirit gjetën 500,000 £ të fshehura në një furgon në një port në Mbretërinë e Bashkuar. Grupet shqiptare të krimit tashmë kontrollojnë shumicën e fermave të kanabisit në të gjithë Mbretërinë e Bashkuar. Vitet e fundit, kriminelët shqiptarë kanë marrë përsipër një pjesë të madhe të tregtisë së kanabisit nga grupet kriminale vietnameze, sipas medias së huaj. Pjesa më e madhe e aktivitetit kriminal që përfshin fermat e kanabisit dyshohet se është e përqendruar në zonat më veriore. Por pothuajse në çdo pjesë të vendit, shqiptarët janë grupi dominues i përfshirë në kultivimin e kanabisit.
GB News raportoi për një njësi të specializuar të policisë në Suffolk kohët e fundit, ku oficerët thanë se shumica e kriminelëve që përdornin rrugët e atij qarku për krimin e drogës ishin shqiptarë. Në jug të vendit, grupet kriminale shqiptare ende kontrollojnë pjesën më të madhe të tregtisë së kokainës. Burimet thanë se tregtia e kanabisit ishte kryesisht e pavarur mes kriminelëve shqiptarë këtu, me më pak kontroll nga bosët e krimit në vendin e tyre. Por tregtia e kokainës mbikëqyret kryesisht nga krerët e krimit në Shqipëri. Në të gjithë Mbretërinë e Bashkuar, së fundmi ka pasur një sërë arrestimesh të shqiptarëve të dyshuar për përfshirje në trafikimin e njerëzve. Sipas GB News, shumë shqiptarë që mbërrijnë në Britaninë e Madhe me varka të vogla janë të lidhura me bandat kriminale dhe një pjesë e madhe do të përfundojnë duke punuar për ato rrjete kriminale. Gjithnjë e më shumë, shumë shqiptarë që hyjnë në sistemin e azilit në Mbretërinë e Bashkuar dhe më pas strehohen në hotele, zhduken brenda disa ditësh, pasi kontaktohen nga grupet kriminale. Shifrat e fundit zbuluan se rreth 60 për qind e atyre që mbërrinin me varka të vogla në Britani kishin ardhur nga Shqipëria.
GB News mund të zbulojë se shumica dërrmuese e operacioneve të trafikimit të njerëzve në kontinentin evropian janë ende të kontrolluara kryesisht nga grupet e krimit kurd, por ata po punojnë gjithnjë e më afër me kriminelët e organizuar shqiptarë. Shumë prej grupeve kriminale shqiptare kanë përdorur rrjetet sociale për të reklamuar personat e interesuar për të realizuar kalimin e kanalit. Ata organizojnë kalimin në Francën veriperëndimore, ku më pas u dorëzohen anëtarëve të bandave kurde.
Muajt e fundit, autoritetet britanike kanë bindur gjigantët e mëdhenj të mediave sociale të heqin më shumë se 1700 video të postuara nga kriminelët shqiptarë./tch
