Sporti i futbolli në vendin tonë po shoqërohet nga probleme të shumta dhe të shumëllojshme, të cilat po vijojnë të ndikojnë negativisht në realitetin e futbollit tonë. Prej vitesh, ky sport nuk po arrin të rikthejë apo të kompesojë investimet e bëra nga presidentët e skuadrave, të cilët gjithnjë dalin të humbur me investimet e tyre. Investimi Në fillimin e sezonit aktual, buxheti i skuadrave në Superligë varionte rreth 1 miliardë lekë. Në këtë shumë janë përfshirë të gjitha investimet që i duhen një klubi për të përballuar sezonin futbollistik. Kryesisht, klubet kërkojnë rimbursimin e këtyre investimeve me pjesëmarrjen e skuadrës së tyre në Kupat e Europës, si të vetmin burim të ardhurash. Humbjet Por shembujt e këtyre viteve nuk na kanë ofruar një përqasje të tillë, ku investimet e kryera nuk janë rimbursuar nga pjesëmarrja në kupat e Europës, pasi pjesëmarrja në raundin e parë, psh në Ligën e Kampioneve, skuadra këmbehet me rreth 250 mijë euro, ndërsa dalja kampion shpërblehet me 70 mijë euro nga FSHF-ja. Në këtë kontekst, klubi kampion rimburson vetëm gjysmën e investimeve. Po për skuadrat e tjera, të cilat nuk e kanë këtë shans, pra për të fituar kampionatin dhe pjesëmarrjen në kupat e europës, çmund të themi? Thjesht, ata dalin me humbje dhe vetëm me humbje, pra investuesit e tyre. Por cilat janë pengesat që ndikojnë negativisht në këtë drejtim, ku falë dashamirësisë dhe vullnetit të presidentëve të skuadrave, futbolli ynë po mbijeton? Mungesa e rregullave Në këtë drejtim mungojnë shumë aspekte, ku ndër më emergjentët është mungesa e rregullave të qarta mbi administrimin e klubit në tërësi. Mungon administrimi i të ardhurave që vijnë nga stadiumi, pasi në këtë mes ndërhyjnë përgjithësisht dhe bashkitë, të cilat kanë në administrim stadiumet. Në këtë kontekst, të ardhurat përgjysmohen, por problemi më i madh në këtë drejtim mbetet mungesa e theksuar e sportdashësve në stadiume si pasojë e shumë faktorëve. Bamirësit Presidentët e skuadrave janë kthyer në bamimës në këtë këndvështrim, pasi ata vetëm investojnë për futbollin, ndërsa futbolli vëtëm merr dhe nuk arrin të kthejë asgjë në xhepin e investuesve. Ky fenomen është krejtësisht i kundërt me realitetin që ofron modeli europian. Në Shqipëri nuk ekziston ende një rregull i caktuar për manaxhimin e investimeve në futboll. Kuptohet, ky problem vjen si pasojë e shumë problemeve të pazgjidhura. Fenomeni shkak-pasojë po ndikon negativisht në zhvillimin e futbollit në Shqipëri. Faktorët Terrenet janë gangrenë e sportit në përgjithësi dhe futbollit në veçanti, i cili po gërryen gjithnjë e më shumë zhvillimin e saj dhe rrjedhimisht dhe largimin e sportdashësve nga shkallët e stadiumeve tona. Largimi i tyre do të thotë minimizim i të ardhurave në arkat e klubeve dhe si pasojë të ardhura të pamjaftueshme për minimizimin e shpenzimeve në klub për investuesit. Fenomeni Por ky fenomen negativ ka ndikuar së tepërmi në largimin e presidentëve të ndryshëm të klubeve dhe vijon të mbetet një problem negativ për zhvillimin e futbollit në Shqipëri. Presidentët aktuale të skuadrave mund të konsiderohen pa dyshim si shpëtimtarët aktualë të këtij sporti, pasi ata kanë marrë përsipër rriskun e humbjes me investimet e tyre. Por kjo gjë nuk mund të vijojë pa fund, pasi si çdo gjë e ka një fund. Duhet urgjentisht të merren masat e duhura për shtrimin dhe aplikimin e rregullave të posaçme në favor të investuesve në sportin e futbollit, në mënyrë që ata të mos jenë thjeshtë humbës.

Të mërkurën, skuadra e kryeqytetit do të luajë një ndeshje për “jetë a vdekje” me kundërshtarin e saj direkt për shpëtim Skuadra tjetër e kryeqytetit është në gjendje shumë delikate në renditjen e Kategorisë së Parë, ku tashmë rrezikon seriozisht rënien nga kjo kategori. Skuadra nga kryeqyteti ndodhet vetëm një pikë përpara vendit që të dërgon në Kategorinë e Dytë. Të mërkurën ata do të përballen me Elbasanin, skuadra e cila është dhe kundërshtari i tyre direkt për shpëtim në këtë kampionat. Dinamovitët do të rikthehen të luajnë në “Qemal Stafa” këtë javë kundër Elbasanit, pikërisht në sfidën më të vështirë dhe më vendimtare të kampionatit. Vetë pozita e dy skuadrave në tabelën e renditjes do ta bëjë shumë interesant këtë sfidë. Ndërkohë që kush arrin tri pikët të mërkurën, do të jetë edhe më e fituara, pasi do të krijojë disi shkëputje nga zona që rrezikon rënien. Për sa i përket stadiumit, FSHF ka hapur dyert për Dinamon që të luajë këtë sfidë në stadiumin e vetëm funksional në kryeqytet, kuptohet me terren të papërshtatshëm.

Skuadra legjendare e futbollit shqiptar është në prag të rikthimit në elitën e futbollit shqiptar, ku mungon prej shumë kohësh Demat e kuq kanë marrë një trepikësh të vyer përballë Mamurasit në baltën e “Qemal Stafës”, duke u afruar së tepërmi ngjitjes në Superligë. Skuadra e kuqe i mungon kategorisë superiore prej katër vitesh, mungesë e cila ka ndikuar ndjeshëm edhe në cilësinë e përballjeve në këtë kampionat, kjo për vetë emrin që mbart ky ekip. Tashmë kur kanë mbetur edhe gjashtë javë nga mbyllja e Kategorisë së Parë, Partizani ndodhet në vendin e dytë, pesë pikë përpara Pogradecit. Faza e dytë ka qenë me dy fytyra për skuadrën, e cila e nisi shumë keq, duke barazuar me Adën në shtëpi dhe duke u larguar katër pikë nga Mamurrasi, që mbante vendin e dytë. Humbja në Pukë solli dhe shkarkimin e Shpëtim Duros nga drejtimi i skuadrës. Me ardhjen e Hasan Likës, skuadra ndryshoi fizionomi, ku arriti të marrë një fitore ndaj Burrelit në fushën e Yrshekut. Kjo ishte dhe pika e kthesës për të kuqtë kryeqytetas, të cilët me atë trepikësh kaluan dhe gjendjen e rënduar psikologjike. Më pas do të vinin dhe dy fitore të tjera në javët pasardhëse, ndaj Dinamos dhe Ilirisë po në fushën e Yrshekut, e cila duhet theksuar se ka qenë fatsjellëse për Partizanin. Nga ana tjetër, fitoret e skuadrës u shoqëruan dhe me humbjet e papritura dhe të çuditshme të Mamurrasit, i cili i liroi vendin e dytë Partizanit. Në ndeshjen e katërt nën drejtimin e Likës, skuadra arriti një barazim të vlefshëm përballë Pogradecit në transfertë, duke ruajtur pozitat në vendin e dytë të renditjes. Fitorja e fundit ndaj Mamurrasit e ka derguar në pesë ndeshje radhazi positive ecurinë e demave të kuq. Me këtë paraqitje, Partizani është fare pranë realizimit të objektivit final, rikthimin midis më të mirëve në Superligë. Në gjashtë ndeshjet e ardhshme, kalendari i Partizanit nuk përmban vështirësi, pasi ata do ndeshen ndaj skuadrave që kanë realizuar objektivat e tyre në këtë kampionat. Gjithsesi, stafi teknik ka kërkuar ndaj skuadrës përqëndrim për mënjanimin e euforisë, e cila duket se do të jetë dhe kundërshari kryesor i demave të kuq në javët në vijim.