Një ekip kërkimor nga Mass General Brigham, Instituti Wyss i Universitetit të Harvardit dhe Instituti i Kancerit Dana-Farber, në bashkëpunim me kolegë nga disa qendra kërkimore, bënë një zbulim jashtëzakonisht të rëndësishëm.
Sipas rezultateve të hulumtimit të ri, të publikuar në Cancer Discovery, një test gjaku ultra i ndjeshëm është në gjendje të zbulojë një proteinë që gjendet vetëm në indet kancerogjene, duke qenë një biomarker i shumë llojeve të kancerit. Nëse efektiviteti i tij konfirmohet, pritet të revolucionarizojë diagnozën, por edhe menaxhimin e sëmundjes.
Studiuesit mblodhën dhe testuan mostrat e gjakut nga pacientët me lloje të ndryshme të kancerit, duke përfshirë kancerin ovarian dhe të zorrës së trashë, duke përdorur teknologjinë e zbulimit të molekulës së vetme SIMOA, e cila u zhvillua në laboratorin e Dr. David Walt nga Departamenti i Patologjisë në Brigham and Women’s Hospital dhe një anëtar themelues i Mass General Brigham.
Testi është projektuar për të zbuluar proteinën ORF1p, e cila siç dihet gjendet në shumë inde kancerogjene, por jo në ato të shëndetshme, duke “dëshmuar” kështu ekzistencën e ndonjë forme kanceri në organizëm.
Si rezultat, testi mati me sukses nivelet e ORF1p në mostrat e gjakut. Për më tepër, ekzaminimi i mostrave të indeve nga 200 biopsi të zorrës së trashë dhe 75 biopsi të ezofagut, të marra nga pacientë në stade të ndryshme të kancerit, tregoi se ORF1p shprehej jo vetëm në indet kancerogjene, por edhe në lezione pararendëse me rrezik të lartë për kancer.
“Ne ishim të habitur se sa mirë funksiononte testi në zbulimin e shprehjes së biomarkerit në lloje të ndryshme kanceri,” tha studiuesi Martin Taylor i Departamentit të Patologjisë në Spitalin e Përgjithshëm të Massachusetts, gjithashtu një anëtar themelues i Mass General Brigham. “Rezultatet tona përforcojnë pikëpamjen se shprehja e ORF1p është një “shenjë dalluese” e kancerit dhe se ajo shprehet herët në procesin e zhvillimit të kancerit,” shtoi ai.
Përparësitë e mëdha të këtij testi përfshijnë koston e tij të ulët, faktin se edhe gjysmë pikë gjaku mjafton për të zbuluar biomarkerin, edhe nëse ai ekziston në nivele shumë të ulëta. Studiuesit shpresojnë se ky test do të ofrojë mundësinë e diagnostikimit më të hershëm të kancerit, por edhe ndjekjen më të mirë të pacientëve pas diagnozës.
Ekipi hulumtues vuri në dukje se studimi kishte një kufizim të madh: ai nuk ofronte informacione të rëndësishme, si p.sh. vendndodhjen e saktë të indeve kanceroze në trup. Për më tepër, nuk dukej se ishte në gjendje të zbulonte me sukses të gjitha kanceret dhe nëntipet e tyre. Ekspertët theksojnë se ky mjet diagnostikues mund të përdoret së bashku me teste të tjera, me qëllim diagnostikimin e hershëm, menaxhimin më efektiv të kancerit, përgjigjen më të mirë të pacientit ndaj trajtimeve dhe zbatimin në kohë të rregullimeve aty ku është e nevojshme.
Studiuesit tani po punojnë me klinicistët për të testuar saktësinë e testit në studime më të mëdha dhe në popullata të ndryshme pacientësh për të vlerësuar më plotësisht vlerën e biomarkerit ORF1p në zbulimin e kancerit.
