Koronavirusi fiton edhe ndaj garës më popullore dhe me pjesëmarrjen më të lartë në botë; maratonës së New Yorkut.
Organizatorët e këtij evenimenti që arrin të bëjë bashkë çdo vit mbi 50 mijë persona dhe që ndiqet nga 1 milion spektatorë në itinerarin e tij në 5 lagje njujorkeze dhe që impenjon 10 mijë vullnetarë, vendosën të anulojnë Maratonën e New York-ut për vitin 2020 duke e shtyrë për vitin e ardhshëm.
Gara e famshme ishte parashikuar që të zhvillohej të dielën e parë të nëntorit të këtij viti, por u bë e pamundur garancia për sigurinë sanitare ndaj Covid-19, ndërkohë që askush nuk e di sesi mund të evoluojë situata në SHBA teksa parashikohet edhe një valë e dytë infektimesh, kështu që u mor vendimi për anulimin e kësaj maratone.
Maratona e New York-ut nuk është eventi i vetëm i rëndësishëm i kësaj disipline që anulohet për këtë vit. Një vendim i tillë është marrë edhe për Maratonën e Berlinit që do të thotë se nuk do të ketë sfidë mes Kipchoges dhe Bekeles për këtë vit në këtë eveniment. Organizatorët e kësaj gare dolën me një komunikatë për shtyp për të bërë vendimin për anulimin e Maratonës së Berlinit për t’u zhvilluar në 2021, pikërisht në të njëjtën ditë kur u mësua edhe anulimi i Maratonës së New York-ut.
E njëjta zgjedhje u bë edhe për gjysmëmaratonën e Londrës, një tjetër garë ku regjistrohen mijëra pjesëmarrës dhe që ishte parashikuar për t’u zhvilluar në 11 tetor. Edhe në këtë rast eventi u shty për një vit më vonë, pikërisht në prill të 2021.
Burimi: top-channel.tv
