Ervin Karamuço, profesor i Kriminologjisë, bën një analizë të agresionit rus ndaj Ukrainës, ku thotë se të shohësh degradimin e një konflikti, sheh edhe prishjen e shumë balancave të disa personave, të cilët ndonjëherë kanë edhe probleme mendore.
Duke iu referuar Presidentit rus, Vladimir Putin, ai ngriti pikëpyetje nëse ndodhemi përpara një lideri që njihej me tipare autoritare, por që sipas tij mund të ketë probleme mendore.
“Kësaj radhe po rrezikohet shumë, se ka përmendur butonin e kuq. Kjo i ka ngritur në alarm. Kërkesa që bënte kongresi amerikan, për inteligjencën është: mblidhni informacion mbi gjendjen shëndetësore, mendore dhe fizike të Putinit. Ai ka manifestuar prej kohësh që nuk është mirë, ai ka mësuar të qeshë, se nuk ka qeshur kurrë. Po të shohësh pamjet e fillimit të takimeve me Putin, ai nuk qeshte, ai është sociopat, nuk ka qenë i shoqëruar. Putin ka patur trauma nga fëmijëria, trauma që e kanë bërë që ta projektojë veten si të fortë. Këto probleme mund të degradojnë në një moshë të caktuar”.
Më tej ai përmendi Wagner, një ushtri të frikshme ruse që është hedhur në veprim, ish-forca speciale ruse, ku siç tha ai, Utkini, është drejtuesi teknik i tyre.
Në këtë drejtim shtoi, se Wagner, është një polici private, e cila ka bërë disa operacione që të kujtojnë luftërat e para dy mijë viteve, pasi nuk paguhen, por veprojnë me plaçkë luftë.
“Utkini, dëgjon muzikën që dëgjonte Hitleri. Dëshiron të kthehet neopaganizmi sllav, të mos ketë kisha të ndara”.
Karamuço nënvizoi gjithashtu se rusët e kanë trurin shumë të fuqishëm, duke e cilësuar si pjesë të identitetit të tyre.
