Shefat ekzekutivë të Pfizer, BioNTech dhe Moderna kanë përfituar më shumë se 100 milionë dollarë paga gjatë pandemisë, duke reflektuar suksesin e madh tregtar të vaksinave me mRNA të Covid, të cilat u zhvilluan nga kompanitë e tyre farmaceutike.
Albert Bourla nga Pfizer, Ugur Sahin nga BioNTech dhe Stéphane Bancel nga Moderna kanë rritur pasurinë e tyre gjatë dy viteve të fundit si rrjedhojë e rritjes së çmimit të aksioneve, e cila u nxit nga entuziazmi i investitorëve për kompanitë që zhvillojnë vaksinat dhe medikamentet kundër Covid-19.
Vaksinat me mRNA të prodhuara nga Pfizer, BioNTech dhe Moderna kanë shpëtuar miliona jetë gjatë pandemisë, duke transformuar gjithashtu kompanitë që i zhvilluan ato dhe duke sjellë një rritje të çmimeve të aksioneve të tyre. Çmimi i aksioneve të Pfizer është rritur me 60 për qind gjatë 24 muajve të fundit; vlera e aksioneve të BioNTech është treshifruar, ndërsa aksionet e Modernës u rritën me pesë herë.
Bancel nga Moderna dhe Sahin nga BioNTech janë bërë miliarderë si rezultat i aksioneve të tyre prej 7.8 për qind dhe 17.1 për qind në kompanitë respektive, të cilat arrijnë një vlerë përkatësisht prej 5.4 miliardë dhe 7.8 miliardë dollarë.
Vaksina e BioNTech/Pfizer gjeneroi 37.5 miliardë dollarë në të ardhura gjatë vitit të kaluar, ndërsa të ardhurat nga vaksina e Moderna arriti në 17 miliardë dollarë, sipas Airfinity.
Një analizë e paketave të shpërblimeve të prodhuesve të vaksinave me mRNA për vitet 2020 dhe 2021 tregon se shefit të Pfizer, Bourla, iu ofrua rritja më e madhe e pagës gjatë pandemisë. Ai mori 45.3 milion dollarë në periudhën e viteve 2020-2021, krahasuar me 27.7 milionë dollarë për periudhën 2018-2019, gjatë së cilës ai u promovua nga shef i operacioneve në CEO të kompanisë, në janar të vitit 2019.
Sahin mori 30.8 milionë dollarë në periudhën e viteve 2020-2021, krahasuar me 8.5 milionë dollarë në periudhën 2018-2019.
Shpërblimi total i Bancel ra gjatë pandemisë, duke shkuar nga 67.5 milionë dollarë në vitet 2018-2019, në 31.1 milion dollarë në vitet 2020-2021. Por kjo ndodhi kryesisht për shkak të një fitimi pas ofertës publike fillestare të Moderna-s në vitin 2018, e cila i solli atij 58.6 milionë dollarë fitime në opsionet e aksioneve.
Shpërblimet totale te tre zhvilluesit e vaksinave me mRNA u rritën në 107.2 milionë dollarë në vitet 2020-2021, krahasuar me 103.7 milionë dollarë në dy vitet e mëparshme./ Financial Times
