Princi Harry pretendon në librin e tij të ri, “Spare”, se vëllai i madh Princi William e sulmoi fizikisht atë, sipas “The Guardian”.
Në një fragment të publikuar nga gazeta, Harry pretendon se William e quajti gruan e tij, Meghan Markle, “të vështirë”, “të pasjellshme” dhe “abrasive”. Ja si e përshkruan ai situatën:
“Gjithçka ndodhi kaq shpejt. Pra shumë shpejt. Më kapi për jake duke më shqyer varsen dhe më rrëzoi në dysheme. Rashë mbi tasin e qenit, i cili u thye nën shpinën time dhe copat më prenë. U shtriva për një moment, i trullosur, më pas u ngrita në këmbë dhe i thashë të dilte jashtë.”
Harry, 38 vjeç, pretendon se sherri i shkaktoi atij një dëmtim të dukshëm në shpinë. Përplasja e nxehtë me William, 40 vjeç, ndodhi në Nottingham Cottage pasi ai shprehu interes për të diskutuar mbi marrëdhënien e tyre. Harry pretendon se William ishte “i nxehur” gjatë bisedës së tyre. Pasi debatuan duke mos i kursyer fyerjet, Harry shkruan se William i kërkoi t’i ndihmonte.
“E ke seriozisht? Më ndihmo? Na vjen keq – kështu e quani këtë? Ndihmë?” -i është përgjigjur Harry. Ky koment, shkruan ai, zemëroi William, i cili më pas filloi të shante ndërsa po shkonte drejt tij. “Willy, unë nuk mund të flas me ty kur je kështu,” i tha Harry William, duke i ofruar atij një gotë ujë para se ai ta sulmonte.
Dy vëllezërit kanë pasur një marrëdhënie të turbullt që kur Harry dhe Markle u larguan nga detyrat e tyre mbretërore në vitin 2020 dhe u transferuan në Kaliforni.
Një krisje në lidhjen e tyre u la të kuptohet në vitin 2019 gjatë një interviste që Harry dha ndërsa ishte në një turne mbretëror në Afrikë, ku zbuloi se ai dhe William ishin tashmë “në rrugë të ndryshme”. Përçarja arriti kulmin në vitin 2021 kur Duka dhe Dukesha i Sussex-it dhanë intervistë për Oprah Winfrey në të cilën Harry pohoi se vëllai dhe babai i tij, Mbreti Charles III, ishin bllokuar në rolet e tyre.
Libri i Harryt “Spare” del në shitje më 10 janar.
