Banorët e Moskës janë të shqetësuar për vendimin e kompanisë Apple për të ndaluar shitjet e produkteve të tyre në Rusi. Apple iu bashkua një liste të gjatë të vendeve perëndimore që pezulluan operacionet në Rusi për shkak të agresionit rus ndaj Ukrainës.
Kompania Apple ka ndaluar shitjet e të gjitha produkteve të saj në Rusi në përgjigje të sulmit rus ndaj Ukrainës.
“Ne jemi thellësisht të shqetësuar për agresionin rus ndaj Ukrainës dhe qëndrojmë me të gjithë njerëzit që po vuajnë si rezultat i dhunës”,
tha kompania Apple në një deklaratë.
Masa të tjera përfshinin kufizimin e transaksioneve përmes aplikacionit Apple Pay dhe heqjen e aftësisë për të shkarkuar aplikacionin “RT News” jashtë Rusisë.
Dyqanet e rishitësve të Apple-it në Moskë dhe Shën Petersburg nuk u hapën të mërkurën. Banorët e Moskës thanë se ishin të zhgënjyer. Disa prej tyre thanë se nuk ishin gati të hiqnin dorë nga produktet e Apple-it.
“Nuk më pëlqen Androidi. Jam mësuar të kem laptopin tim Apple, telefonin, kufjet dhe orën. Më pëlqen që pajisjet e mia mund të më japin këshilla dhe të më tregojnë se si ndihem. Nëse i humbas të gjitha, do të jem shumë i zhgënjyer. Nuk dua t’i shes të gjitha për asgjë”,
thotë Nikita.
Megjithatë, të tjerë pranuan se mund të konsideronin kalimin në marka të tjera nëse është e nevojshme dhe theksuan se shqetësohen për “operacionin ushtarak”, siç e qujnë luftën në Ukrainë dhe jo për shitjet e Apple-it.
“Sigurisht, që më shqetëson, por jam gati të heq dorë nga produktet e Apple-it. Më e rëndësishmja tani është të arrihet paqe. Kjo është më e rëndësishmja. Çështja e përdorimit të Apple-it ose Samsung-ut është dytësore”,
thotë Nelly banore e Moskës.
Kompani të tjera amerikane të teknologjisë si Google, Meta (Facebook) dhe Twitter kanë marrë gjithashtu masa për të sanksionuar Rusinë dhe për të siguruar që platformat e tyre të mos përdoren si mjete strategjike të luftës.
Rubla ruse arriti një rekord të ri të ulët të mërkurën, duke u shkëmbyer 110 rubla për një dollar amerikan. Banka Qendrore e Rusisë mori masa urgjente për të luftuar inflacionin, duke përfshirë rritjen e normës bazë të interesit nga 9.5 përqind në 20 për qind të hënën./VOA
