Një 19-vjeçar është vënë në pranga pasi dyshohet se dhunoi një të moshuar e mori një shumë parash.
I riu Klajdi Jaupi, nga fshati Poroçan i Gramshit mësohet se ka goditur me grushte dhe sende të forta, një 82-vjeçar, dhe i ka marrë atij 55 000 lekë.
Sipas informacioneve, menjëherë pas marrjes së njoftimit, Policia ka mundur të identifikojë autorin si dhe ka nisur punën për vënien e tij para përgjegjësisë ligjore.
Njoftimi i Policisë:
I mori me dhunë një shumë parash, një shtetasi të moshuar, identifikohet, kapet dhe vihet në pranga 19-vjeçari.
Shërbimet e Komisariatit të Policisë Gramsh, menjëherë pas marrjes së njoftimit se në fshatin Poroçan, një shtetasi të moshuar i kishin marrë me dhunë një shumë parash, kanë shkuar menjëherë në adresën e dhënë dhe kanë organizuar punën për identifikimin dhe vënien përpara përgjegjesisë ligjore të autorit të këtij rasti.
Në këtë kuadër, falë veprimeve të shpejta hetimore profesionale, u bë identifikimi, kapja dhe arrestimi i shtetasit K. J., 19 vjeç, banues në fshatin Gjerë, Gramsh, për veprën penale “Vjedhja me dhunë”.
Nga veprimet hetimore rezultoi se ditën e djeshme, në fshatin Poroçan, 19-vjeçari ka goditur me grushte dhe sende të forta, shtetasin M. R., 82 vjeç, dhe i ka marrë atij 55 000 lekë, të cilat Policia i ka gjetur dhe i ka sekuestruar në cilësinë e provës materiale.
Shtetasi M. R. ndodhet në kujdesin e mjekëve, jashtë rrezikut për jetën.
a.c./dita
