Hakerat iranianë kanë ‘goditur’ sërish. ‘Homeland Justice’ këtë herë ka publikuar 1000 llogari bankare të qytetarëve shqiptarë, korporatave dhe shoqërive shqiptare me të dhëna sensitive, përfshi këtu edhe shumën e parave të depozituara.
Databaza e publikuar prej grupit të hakerave “Homeland Justice” përmban 1,000 llogari bankare, me emrin përkatës, numrin serial, shumën e depozituar, numrin e telefonit, adresën dhe degën e bankës. Krah dokumentit, hakerat kanë dhënë edhe një mesazh.
“Sipas opinionit tuaj, në cilën bankë sundimtarët e korruptuar të Shqipërisë i pastruan paratë që morën nga Muxhahedinët. Na e specifikoni”, shkruajnë hakerat bashkangjitur me databazën e të dhënave të publikuara.
Kujtojmë se kjo nuk është hera e parë që hakerat e ‘Homeland Justice’ publikojnë të dhëna mbi qytetarët shqiptarë, pasi më parë janë publikuar të dhënat mbi zyrtarë të ndryshëm si ish-kreu i SHISH dhe drejtorin e Përgjithshëm të Policisë Muhamet Rrumbullaku, si dhe udhëtimet me avion të kryeministrit Rama.
