Ulja drastike e kostove të Elon Musk në Twitter ka disa pasoja të papritura për punëtorët, duke bërë që banjot të mbushen me erë të keqe dhe të mbesin pa letër higjienike.
Gjatë tre ditëve të fundit, stafi në zyrën e Twitter në lagjen Chelsea të Nju Jorkut ka parë efektet e vendimit të miliarderit për të mos rinegociuar kontratat e punonjësve të mirëmbajtjes së objekteve që trajtonin furnizimet dhe pastrimin e zyrës.
Erërat nga banjat e papastra dhe nga disa tualete të bllokuara kanë filluar të ndjehen në korridoret dhe hapësirat e punës, sipas dy personave të njohur me situatën e “qelbur” dhe mesazhet të cilat kanë shkuar tek Business Insider.
Letra higjienike nuk gjendet askund në zyrë, thanë këta persona, të cilët kërkuan të mos identifikoheshin duke diskutuar për tema të dëmshme. Në ndërkohë, Musk ende kërkon që pothuajse të gjithë të punojnë në zyrë pesë ditë në javë.
Ka pasur disa kërkesa në platformën Slack dhe me email nga punonjësit për dikë në kompani për të korrigjuar situatën e përkeqësuar të banjës, thanë njerëzit e njohur.
Deri të enjten pasdite, askush nuk kishte marrë përgjigje, teksa një zëdhënës i Twitter nuk iu përgjigj një kërkese për koment të bërë nga ana e Business Insider.
