Botuar në DITA
Është mbajtur dje në Kolegjin e Posaçëm të Apelimit seanca e radhës për drejtuesen e prokurorisë së Tiranës, Elisabeta Imeraj.
Si fillim, e mori fjalën avokati i prokurores Gregori Twon, i cili tha para trupës gjyqësore të KPA se për të vlerësuar figurën e prokurores, Kolegji duhet të bazohet në prova dhe jo në burime anonime, duke iu referuar disa denoncimeve që janë bërë nën anonimitet kundër prokurores.
Më pas ishte Imeraj ajo që mori hap pas hapi të gjitha çështjet që ishin ngritur në drejtim të saj, për t’i sqaruar dhe kundërshtuar duke paraqitur provat e saj shkresore. Ajo kërkoi që këto dëshmi të merreshin në cilësinë e provës nga ana e KPA.
Imeraj u ndal të sqaronte disa aspekte mbi çështjet e ngritura për verifikimin e figurës së saj.
“Sipas Theo Jakobs unë duhet te mbaja mend një incident i cili kishte ndodhur mes një studenti (ish bashkëshorti i Imeraj) në 1999 me komisioneren zonja Bungo, ku ishin grindur ajo dhe studenti. Këtë rast duhet ta mbaj unë mend apo zonja Bungo që ka qenë e përfshirë në atë situatë? Nëse ajo nuk e mbante mënd këtë rast, si mund të pretendohet që ta mbaja unë?!
Akuza tjetër se unë paskam përgjuar vëzhguesin ndërkombëtar nuk është i vërtetë dhe nuk kuptoj arsyen pse një ish-vëzhgues ndërkombëtar i larguar nga Shqipëria më bën një akuzë të tillë. Më pëlqen të besoj se vëzhguesi ndërkombëtar ka qenë i keq informuar. Është jo vetëm për mua e turpshme, por për gjithë shqiptarët që kemi virtyt mikëpritjen”, pohoi Imeraj dhe sqaroi se kishte kryer vetë kallëzim penal që të vërtetohej nëse dikush kishte përgjuar vëzhguesin ndërkombëtar.
Po ashtu, ajo sqaroi se u ishte drejtuar gjithë institucioneve ligjzbatuese kërkesë nëse kishin ndonjë informacion të tillë, por përgjigjet sipas saj ishin negative.
Me tej prokurorja Imeraj u ndal te një emër i cili ka bërë një denoncim në lidhje me punësimet që sipas tij janë bërë nga Imeraj
“Valentino Imeraj ka dërguar një e-mail se Elisabeta Imeraj ka punësuar në prokurorinë e Tiranës 3 persona të afërm të anëtarëve të prokurorisë. Gjuha e përdorur nga Valentino Imeraj në e-mail është fyese ndaj trupës gjykuese.
Unë kam bërë një kërkim në gjendjen civile dhe nuk ekziston asnjë individ në Shqipëri më këtë emër. Kaq e vështirë është të zbulohet kjo !? Sot jemi këtu dhe po japim llogari për atë që thotë një person i rremë, ndërkohë në 10 ditë kohë muhd të verifikohej gjithçka”.
Nga ana tjetër Imeraj, në lidhje me divorcin nga ish-bashkëshorti ka sqaruar se të dy kanë vendosur që pensioni ushqimor të paguhet njëherë në vit dhe është bërë në të njëjtën datë, 07.07 2020-07.07.2021.
Gjatë fjalës së saj Elisabeta Imeraj ka sjell disa raste ku është paragjykuar edhe për shkak të origjinës
“Në 2017 kur unë kisha një hetim që kishte lidhje me politikën, i kuptoja stigmatizimet ndaj meje, për shkak të origjinës sime. Por kur Genta Bungo i thoshte shtetases me iniciale A.H çfarë ke ti “një maloke më pak do kemi tani”, kjo është e turpshme.
Imeraj është ndalur edhe te fisi i ish-bashkëshortit.
“Rrahim Shehu ka dërguar një letër ku unë akuzohem se jam nuse në fisin Bajri, një fis në Shkodër i cili ka kryer një sërë krimesh dhe është dënuar. Por ish-bashkëshorti im nuk ka asnjë lloj lidhje me ta. Ka shumë zona në Shqipëri qe kanë të njëjtin mbiemra”.
Imeraj vuri në dispozicion edhe një dokument të marr në datën 30.9 2021 që tregonte se ish bashkëshorti i saj rezulton i padënuar nga gjykatat italiane. Po ashtu, ai rezulton i pastër edhe nga dokumenti i lëshuar nga Ministria e Drejtësisë në Shqipëri.
Imeraj kërkoi që të gjitha provat e siguruara prej saj për të kundërshtuar gjetjet e ONM-së dhe akuzat e reja e Komisonerit Publik të administrohen, si dhe kërkoi një hetim të thellë e të gjithanshëm, për të zbuluar të vërtetën faktike.
Imeraj duke hyrë në KPA
Drejtuesja e Prokurorisë së Tiranës Elizabeta Imeraj po mbrohet në KPA nga avokati i Dhomës së Avokatisë së Strasburgut, Gregory Thuan Dit Dieudonne.
