Zlatan Ibrahimovic është i padurueshëm dhe mezi pret të kthehet në dispozicion të Milanit të tij dhe Stefano Piolit. Sidoqoftë, suedezi flet me pjekurinë e dikujt që e di se nuk mund të vrapojë shumë.
“Unë po ndjek protokollin e rikuperimit dhe po bëhem më mirë çdo ditë, – tha sulmuesi suedez në një intervistë ekskluzive për “SportMediaset”. – Milanit i mungon Ibra dhe mua më mungon skuadra. Të jesh në fushë është një gjë krejtësisht tjetër; adrenalina, turma, aroma e barit, duelet. Dua të ndihem i gjallë në fushë…, kjo më mungon”.
E vështirë për dikë si Zlatan të qëndrojë jashtë fushave për kaq gjatë, plot 6 muaj, por tek ai ekziston vetëdija se t’i japësh trupit kohën e duhur është e vetmja mënyrë për t’u rikthyer në majë: “Kur ndalon, është e pamundur t’i gjesh të gjitha ato ndjesi diku tjetër, që siç e kam thënë shumë herë, edhe ato janë të vështira për tu shpjeguar.
Megjithatë, kur u operova mendova se rikthimi do të ishte akoma më i kënaqshëm dhe më i bukur. Për momentin më duhet vetëm durim”.
Sapo të jetë gati, qasja e tij nuk do të ndryshojë, as roli në fushë dhe në dhomat e zhveshjes. Suedezi do të mbetet lideri, shembulli për lojtarët e rinj: “Sfida është të bësh gjithmonë më shumë, nuk jam kurrë i kënaqur. Natyrisht, gjithçka është ndryshe nga dikur.
Dhjetë vite më parë egoja ime ishte më e madhe se gjithçka, sot me përvojën, moshën dhe pjekurinë gjërat janë ndryshe. Kur u ktheva në Milano isha më i madhi nga të gjithë. Nuk erdha për të mësuar, por për të dhënë. Doja ta përmirësoja ekipin kolektivisht dhe individualisht”.
